Павал Севярынец: Думаю, у вызваленнях будзе перапынак

Сустаршыня аргамітэта партыі “Беларуская Хрысціянская дэмакратыя” Павал Севярынец, які абдывае пакаранне на “хіміі” па “справе 19 снежня”, не чакае на сваё вызваленне бліжэйшымі днямі. Пра гэта ён распавёў Службе інфармацыі “ЕўраБеларусі”.

На думку палітыка, вызваленне экс-кандыдата ў прэзідэнты Андрэя Саннікава і яго даверанай асобы на апошніх выбарах Змітра Бандарэнкі звязаныя з тым, што палітвязняў прымусілі падпісаць прашэнні аб памілаванні.

“Думаю, тут будзе пэўная розніца паміж тымі, хто падпісаў і хто не”, - зазначыў Павал Севярынец.

Ён спадзяецца, што сам будзе вызвалены прыблізна ў чэрвені: “Мяркую, гэта адбудзецца недзе месяцы праз два”.

Сустаршыня БХД заўважыў, што вяртанне дамоў Андрэя Саннікава і Змітра Бандарэнкі прыйшлося менавіта на Вялікдзень па ўсходне-хрысціянскім календары.

“Гэта сведчанне Божай ласкі! Сапраўды аб’явілася моц уваскрослага Хрыста! Дзякуй Богу, што людзі могуць вярнуцца дамоў, дзе іх чакаюць сем’і”, - дадаў Павал Севярынец.

Адзначым, што 15 красавіка ў 2012 годзе прыпадае на свята Божай міласэрнасці, які адзначаюць каталікі. Зміцер Бандарэнка, вызвалены з калоніі ў гэты дзень, з’яўляецца вернікам Рыма-каталіцкай царквы.

У сваю чаргу Андрэй Саннікаў паведаміў, што быў вызвалены згодна ўказа аб памілаваннні, падпісанага 14 красавіка.