Мінск развітаўся з Арынай Вячоркай

Паніхіда па вядомай беларускай дзяячцы Арыне Вячорцы адбылася 12 красавіка ў мінскай царкве святых Пятра і Паўла.

Як паведаміў сын спадарыні Арыны Францішак Вячорка на сваёй старонцы ў Facebook, пахаванне адбудзецца ў вёсцы Міханавічы, што ў Мінскім раёне, “Памінкі – а 19-ай”, - удакладніў ён.

Ружана, Радаслава, Вінцук і Францішак Вячоркі

Развітацца з спадарыняй Арынай прыйшлі мовазнаўца Пятро Садоўскі і паэт Уладзімір Някляеў

У Вільні развітанне з Арынай Вячоркай адбылося 11 красавіка.

Як раней паведамляла Служба інфармацыі “ЕўраБеларусі”, спадарыня Арына 5 красавіка ляцела на адпачынак у Барселону, калі ў аэрапорце ў Вільні з ёй здарыўся інсульт. З таго часу яна заставалася ў коме і памерла 9 красавіка, не прыходзячы ў прытомнасць.

Арына Вячорка нарадзілася 14 красавіка 1961 года ў Мінску, займалася педагагічнай, грамадскай і культурнай дзейнасцю, з’яўлялася ініцыятаркай адраджэння рыцарскага руху і гістарычнай музыкі Беларусі. У яе засталося трое дзяцей — Радаслава (юрыст), Францішак (журналіст і грамадскі актывіст), Ружана (школьніца), а таксама ўнук Даніла.