Публічная лекцыя Андрэя Расінскага "Унікальнасць тыражаванага"

Адукацыйная праграма "Лятучы універсітэт" запрашае на чарговую лекцыю з цыкла публічных лекцый “Urbi et Orbi” (“Гораду і Свету”) - лекцыю культуролага Андрэя Расінскага "Унікальнасць тыражаванага".

Публічныя лекцыі цыклу “Urbi et Orbi” арганізуюць прастору і час такім чынам, каб даць мажлівасць лектару звярнуцца да інтэлектуальнай супольнасці і ўсіх зацікаўленых беларусаў з тым, што ён лічыць важным і актуальным у культуры і грамадскім жыцці Беларусі.

13 красавіка лекцыяй “Унікальнасць тыражаванага” культуролаг Андрэй Расінскі правакуе публічнасць “Гораду і Свету” на дыскусію пра тыражаванне як механізм унікалізацыі культурнай з’явы, сцвярджаючы: “Толькі тое, што патэнцыйна тыражавана, што распачынае ці завяршае тыражную серыю, з’яўляецца ўнікальным. Нетыражаванае - выпадае з камунікацыі”. Лектар прапануе разгледзець тыражных герояў, тыражныя гісторыі і сюжэты, біяграфію аўтара як адну з матрыц тыражавання; інтрыгуе трохкутнікам тыражавання як абавязковай умовай паспяховасці, закране нават сакральныя рэчы - прыклады паспяховага тыражавання ў Бібліі, а таксама разважае пра вірусныя хваробы камунікацыі як тое, што блакуе сістэму глыбінных матрыц тыражавання. Апошняе закранае адну з сур’езных праблем актуальнай культуры беларусаў: “Зараз у нас афіцыйная культура - гэта культура смецця. Прычым смецця, якое мусіць заблакаваць камунікацыю як такую, заблакаваць тыражаванне як такое. Гэта вірусная сістэма, калі ўсё забіваецца “шумам у эфіры”. У нас няма творчых асяродкаў, людзі не бачаць і не чуюць адзін аднаго!” - зазначае Андрэй Расінскі ў сваім інтэрв’ю.

Якія механізмы могуць паспрыяць наладжванню культурнай камунікацыі ў Беларусі? Наколькі прапанаваныя лектарам матрыцы тыражавання прыдатныя для беларускай сітуацыі? Якія героі, сюжэты, аўтары патэнцыйна тыражаваныя, а значыць, здольныя зрабіць беларускую культуру паспяховай і звышпапулярнай, а не маргінальнай і перыферыйнай? Як адрэагуе на гэта культурнае асяроддзе?

Запрашаем паддацца правакацыі і падыскутаваць пра гэта 13 красавіка ў гарадскім кафэ “Лофт” (вул. П. Броўкі, 22 - каля Мастацкай вучэльні імя Глебава). Звяртаем увагу на тое, што лекцыя пачнецца а 18.00!

Уваход вольны!

Тэзісы і план лекцыі

Анлайн-трансляцыя лекцыі: http://distance.fly-uni.org/mod/page/view.php?id=440