Адышла ў вечнасць Арына Вячорка

Личности

Міжнародны кансорцыюм “ЕўраБеларусь” выражае спачуванні родным і блізкім вядомай культурніцкай дзяячкі Арыны Вячоркі, якая сышла з жыцця 9 красавіка ў Вільні.

Спадарыня Арына 5 красавіка ляцела на адпачынак у Барселону, калі ў аэрапорце ў Вільні з ёй здарыўся інсульт. З таго часу яна заставалася ў коме і памерла, не прыходзячы ў прытомнасць. Калі і дзе адбудзецца пахаванне, пакуль невядома.

Арына Вячорка (Ірына Паладзеўна Ползік) нарадзілася 14 красавіка 1961 года ў Мінску, займалася педагагічнай, грамадскай і культурнай дзейнасцю, з’яўлялася ініцыятаркай адраджэння рыцарскага руху і гістарычнай музыкі Беларусі. Працавала ў беларускіх школах Мінску, у Лабараторыі філязофіі і гісторыі адукацыі Нацыянальнага інстытуту адукацыі. Аўтар артыкулаў з гісторыі беларускай педагогікі, гісторыі матэматыкі і тэхнікі для “Энцыклапедыі гісторыі Беларусі”, “Гісторыі беларускай навукі і тэхнікі”. Укладальніца двухтомнай бібліяграфіі гісторыі беларускай пэдагогікі.

Сузаснавальніца першага беларускага нефармальнага згуртаваньня новага часу “Беларуская спеўна-драматычная майстроўня” (1980–1985). Удзельніца руху за адраджэнне беларускай школы з 1983 году. Сузаснавальніца моладзевага адраджэнцкага згуртаваньня “Талака” (1986–1988).

Прадусар гурту “Стары Ольса”, музычнага праекту “Вір”. Кансультант музычнага праекту “Гістарычны эпас”, фільма “Старадаўнія музычныя інструменты Беларусі”.

Намесьніца дырэктара ААТ “Новая музычная кампанія” (2007–2009), намесьніца дырэктара выдавецтва “Каўчэг” (з 2009). Каардынатар міжнародных праектаў Дома сустрэчаў “Мікушэва” (Польшча, з 2011). Аўтар праекту “Ноч музыкі” ў Белдзяржфілярмоніі (2010).

У Арыны Вячоркі засталося трое дзяцей — Радаслава (юрыст), Францішак (журналіст і грамадскі актывіст), Ружана (школьніца), а таксама ўнук Даніла.