Рада Еўропы: Не можа быць кантактаў з Мінскам да вызвалення палітвязняў

Личности

Рада Еўропы не можа падтрымлівацье стасункі з беларускімі ўладамі. Пра гэта заявіў генэральны сакратар арганізацыі Турб’ёрн Ягланд.

“У нас няма аніякіх кантактаў на палітычным узроўні, але мы працуем з грамадзянскай супольнасцю і сродкамі масавай інфармацыі. Пакуль Беларусь не адменіць смяротнае пакаранне і ня вызваліць палітвязьняў, мы не можам мець з ёй палітычных кантактаў. Гэта неверагодна, што кандыдаты ў прэзыдэнты ўсё яшчэ ў няволі”, - прыводзіць яго словы “Радыё Свабода” з спасылкай на аўстрыйскую Die Presse.

Ён падкрэсліў, што Беларусь, адзіная краіна на кантыненце, што не ўваходзіць у Раду Еўропы, застаецца тут і адзінай дзяржавай, якая ўсё яшчэ ўжывае смяротнае пакаранне. Напярэдадні ж прэзыдэнцкіх выбараў 2010 году Мінск падаваў сыгналы, што можа скасаваць гэты від пакарання.

“Былі выразныя знакі, што Беларусь хоча стаць часткай еўрапейскай сям’і. Аднак я ўпэўнены, што гэтая краіна некалі стане членам Рады Еўропы. Іншае было б проста вар’яцтвам”, - кажа Турб’ёрн Ягланд.

Раней генсакратар арганізацыі асудзіў расстрэлы абвінавачаных у тэрарызме Уладзіслава Кавалёва і Змітра Канавалава, адзначыўшы, што “такім стаўленьнем да жыцця чалавека, непавагай да яго асноўных правоў і дэмакратычных стандартаў улады Беларусі ўсё больш ізалююць сваю краіну і яе людзей ад усяго астатняга свету”.

Як раней паведамляла Служба інфармацыі “ЕўраБеларусі”, нядаўна Турб’ёрн Ягланд заявіў, што Еўропа "ніколі не зможа прымусіць Лукашэнку рэфармавацца і сысці ад улады самастойна". "Мы маем дачыненне з класічным дыктатарам. Усе дыктатары маюць галоўны прыярытэт – выжыванне”, - зазначыў ён і прапанаваў свой план дзеянняў у дачыненні да Беларусі, які прадугледжвае адзіную палітыку Еўропы з удзелам Расіі.