Стан здароўя Каваленкі набліжаецца да цяжкага

Стан здароўя Сяргея Каваленкі, які трымае галадоўку, у параўнанні з апошнімі днямі пагоршыўся і стаў бліжэй да цяжкага. Пра гэта заявіў лекара псыхіятрычнага шпіталю пры калоніі “Віцьба-3”, дзе утрымліваюць палітвязня.

Такую інфармацыю лекар паведаміў жонцы палітычнага актывіста Алене Каваленцы, якая датэлефанавалася ў шпіталь.

Ён таксама зазначыў, што калі стан здароўя вязня будзе пагаршацца, то Сяргея Каваленку могуць перавесці ў цывільны шпіталь, перадае “Радыё Свабода”.

Аднак спаткацца з вязнем 2 красавіка адміністрацыя калоніі ані жонцы вязня, ані яго маці Лідзіі Каваленцы, не дазволіла. На дадзены момант, па словах Алены Каваленкі, яе мужа праз зонд кормяць малочнай сумесю для кармлення немаўлят.

“Шэсць разоў на дзень яму ўліваюць сумесь „Беллакт“, паведаміў лекар. Пачалі гэтак карміць яшчэ ўчора, у нядзелю. Таксама працягваюць ставіць кропельніцы. Паводле лекара, ягоны стан „больш-менш“. Тэмпэратура паніжаная, ціск быццам нармальны. Але сам Сяргей есці па-ранейшаму адмаўляецца. Мяркую, калі б яго паклалі ў цывільны шпіталь, ён бы і сам пагадзіўся выходзіць з галадоўкі, а турэмным лекарам ён не давярае. Нас да Сяргея нікога не дапускаюць”, - распавяла яна.

Як раней паведамляла Служба інфармацыі “ЕўраБеларусі”, 29 сакавіка з Сяргеям Каваленкам сустрэўся яго адвакат. Па словах абаронцы, апазіцыянер памірае: вязень на той момант важыў 45 кг. Каваленка галадае з 20-дзённым перапынкам з сярэдзіны снежня. Актывіст КХП БНФ пратэстуе супраць пакарання ў выглядзе 2 гадоў і месяца пазбаўлення волі за парушэнне парадку адбыцця хатняй “хіміі”, якую ён атрымаў раней за вывешванне бел-чырвона-белага сцяга на каляднай хваінцы ў Віцебску.