Андрэй Казакевіч: Калі беларускія ўлады ня зменяць пазiцыю, яны могуць атрымаць сіметрычны адказ

Калі беларускія ўлады не зменяць сваёй пазіцыі ў канфлікце з амбасадарамі краін Еўрасаюза, узровень двухбаковых адносінаў абавязкова знізіцца. Пра гэта Службе інфармацыі “ЕўраБеларусі” заявіў дырэктар Інстытута палітычных даследванняў Андрэй Казакевіч.

Так ён пракаментаваў заяву старшыні камітэта замежных справаў Сейму Літвы Эмануэліса Зінгерыса, які параіў беларускім уладам “не загуляцца” у канфлікт, бо ў найгоршым выпадку Еўрасаюз можа выслаць амбасадараў Беларусі.

“Дастаткова лагічная заява, таму што звычайна калі высылаюць дыпламатаў з нейкай краіны, забараняюць ім уезд, дык адпаведна прымаюцца сіметрычныя дзеянні той краінай, у дачыненні да якой такія рашэнні прымаюцца. Гэта так ці інакш патрабуе нейкага рэагавання”, - кажа Андрэй Казакевіч.

Відавочна, такое развіццё падзеяў Беларусі нічога добрага не прынясе.

“Канешне, непажадана, каб зараз адбывалася далейшая эскалацыя гэтай сітуацыі. Бо калі беларускіх амбасадараў не будзе ў ЕС, а дыпламатаў Еўрасаюза - у Беларусі, узровень адносінаў паміж Беларуссю і Еўрапейскім Саюзам, натуральна, значна знізіцца. А магчыма нават - нейкія функцыі гэтых стасункаў пяройдуць, напрыклад, у Маскву ці яшчэ куды. Таму калі беларускія ўлады не зменяць сваю пазіцыю, напэўна, гэта будзе вымушая мера з боку ЕС проста для захавання твару, для для сіметрычнага адказу. Хацелася бы спадзявацца, што да гэтага не дойдзе і Мінск часткова зменіць сваю пазіцыю па гэтым пытанні”, - зазначыў суразмоўца.

Ці беларускае кіраўнцтва сапраўды прыслухаецца да парадаў палітыкаў Еўрасаюза, ці будзе працягваць трымацца сваёй пазіцыі, што непазбежна прывядзе да зніжэння ўзроўня стасункаў з ЕС, ён сказаць не бярэцца.

“Зараз немачгыма нічога прагназаваць. Апошнія дзеянні, з майго пункту гледжання, былі не зусім рацыянальнымі. Яны былі альбо эмацыйнымі, альбо гэта была адмысловая гульня для ўздзеяння на сітуацыю. Але ў дадзенай сітуацыі, канешне, нешта прагназаваць складана. Калі зразумелыя матывы, логіка нейкіх крокаў - прадказваць можна. Калі ж гэта не выдавочна, тут цяжка знайсці нейкае надзейнае абгрунтаванне для прагнозу”, - дадаў Андрэй Казакевіч.

Як раней паведамляла Служба інфармацыі “ЕўраБеларусі”, 15 сакавіка Міністэрства замежных спраў Беларусі заявіла, што вяртанне еўрапейскіх дыпламатаў у Мінск можа адбыцца выключна ў тым выпадку, калі ЕС адмовіцца ад новых абмежаванняў супраць беларускіх уладаў. Аднак 23 сакавіка ЕС вырашыў пашырыць гэтыя санкцыі ў звязі з пагаршэннем у Беларусі сітуацыі вакол правоў чалавека.