Шушкевіча ўзнагародзілі медалём Свабоды

Личности

Былы кіраўнік Беларусі Станіслаў Шушкевіч атрымаў Мэдаль свабоды ад Фонду ахвяраў камунізму. Палітык наведаў Мемарыял ахвярам камунізму ў Вашынгтоне 25 сакавіка.

“Маёй ангельскай мовы хапае, каб прачытаць надпіс на помніку. Я прачытаў і пра 100 мільёнаў ахвяраў, і кожны разумее гэта па-свойму, а я разумею гэта з пазыцыі маёй краіны, Беларусі. З гэтых 100 мільёнаў у мяне найбольшы боль за тых 30 людзей, маіх родных, якіх я страціў. У маёй маці было 11 братоў і сёстраў, у майго бацькі было 10 братоў і сёстраў. Вялікія сем'і былі, пасля рэпрэсій засталося 3 сястры ў маці і сястра і брат у бацькі. Усе астатнія загінулі. Мой бацька выжыў, але ён быў 20 гадоў у Сібіры. Толькі дзякуючы сваёй мужнасці ён выжыў. Не па сваёй волі ён быў у Сібіры”, - цытуе Станіслава Шушкевіча “Радыё Свбода”.

“Вуліца, на якой я жыў у Мінску, гэта была вуліца з маленькімі дамамі, і там не было дому, дзе не было б рэпрэсаваных. І я паглядзеў на гэты помнік і падумаў, што мы павінны дажыць да таго часу, я хачу дажыць да таго часу, калі ў маёй Беларусі, у маім Мінску будзе помнік ахвярам з абодвух бакоў – з боку фашызму і з боку камунізму, усіх пачварных дыктатарскіх рэжымаў. Ваш мэдаль прымусіць мяне паводзіць сябе так, як я ўмею, дзеля таго, каб гэтага дамагчыся”, - дадаў палітык.

Як раней паведамляла Служба інфармацыі “ЕўраБеларусі”, Станіслава Шушкевіча нядаўна затрымалі на беларуска-літоўскай мяжы, адмовіўшы яму ў выездзе з Беларусі. Палітык патлумачыў, як ён здолеў выехаць за мяжу пасля гэтага.

“Я вярнуўся ў Мінск, і мне сябра кажа: “Чаго ты плачаш? Я еду ў Латвію і я цябе завязу. Мы паехалі праз Расію ў Латвію, і на расійска-латвійскай мяжы ніхто не здзівіўся майму пашпарту з пячаткай пра забарону на выезд. І так я апынуўся на тэрыторыі Латвіі, і адтуль ва ўсе краіны Еўрасаюза я магу ездзіць”, - распавёў Станіслаў Шушкевіч.