Алесь Бяляцкі стаў лаўрэатам прэміі Нарвежскай асацыяцыі аўтараў

Личности

Беларускі палітвязень Алесь Бяляцкі, які ўтрымліваецца ў Бабруйскай калоніі, пэўна, не ведае, што ў гэтую нядзелю ён стаў лаўрэатам прэміі Freedom of Expression, якую прысуджае Нарвежская асацыяцыя аўтараў.

Гэтую ўзнагароду атрымліваюць праваабаронцы, журналісты, літаратары, якія змагаюцца ў несвабодных краінах за свабоду выказвання меркаванняў, паведамляе "Радыё Свабода".

"Для майго мужа будзе сапраўдным сюрпрызам, калі я, вярнуўшыся дадому, напішу пра гэта", — завіла нарвежскім журналістам на цырымоніі ўзнагароджання жонка Бяляцкага Наталля Пінчук. Яна ўпэўненая, што прэмія ўзрадуе яе мужа.

Паводле прадстаўнікоў Association Freedom of Expression-Preis, узнагарода, прысуджаная Алесю Бяляцкаму - гэта ацэнка ягонай працы і тых высокіх мэтаў, якія ставяць перад сабой праваабаронцы "Вясны". Таксама гэта прызнанне дзейнасці беларускага палітзняволенага на міжнародным узроўні.

Бяляцкі знаходзіцца ў Бабруйскай калоніі ад канца лютага.

24 студзеня Мінгарсуд разгледзеў касацыйную скаргу кіраўніка праваабарончага цэнтра "Вясна", віцэ-прэзідэнта Міжнароднай федэрацыі правоў чалавека Алеся Бяляцкага, асуджанага на 4,5 гада турмы. Прысуд Бяляцкаму пакінулі без змены. Яго прызналі вінаватым у няплаце падаткаў. Праваабаронца сваёй віны не прызнаў і заявіў, што ўсе грошы, атрыманыя на ягоныя рахункі, ішлі на праваабарончую дзейнасць.

Падставай для крымінальнага пераследу Бяляцкага стала інфармацыя пра банкаўскія рахункі, якую перадалі афіцыйнаму Мінску Літва і Польшча.

Краіны Еўразвязу, ЗША і міжнародныя праваабарончыя арганізацыі лічаць Бяляцкага палітвязнем, а прысуд яму — палітычна матываваным. Яны патрабуюць ад уладаў Беларусі вызваліць праваабаронцу.