Кэтрын Эштан: Вярніце палітвязняў іх сем’ям!

Личности

На пасяджэньні камітэту па міжнародных справах Еўрапарлямэнта кіраўніца знешняй палітыкі Еўрапейскага Саюза Кэтрын Эштан патлумачыла палітыку ЕС адносна Беларусі.

“У дачыненні да Беларусі на нядаўнім саміце ў Капэнгагене мы абмяркоўвалі пераход ад ізаляцыі да ўзаемадзеяння - мы часта рухаемся недзе паміж гэтымі двума падыходамі. Санкцыі дасылаюць вельмі моцны палітычны і эканамічны пасыл краіне. І ў дачыненні да Беларусі мы выказваем сваю пазыцыю вельмі ясна, і будзем працягваць гэта рабіць і надалей”, - цытуе яе “Радыё Свабода”.

Вярхоўны прадстаўнік ЕС па замежных справах і палітыцы бяспекі звярнулася і непасрэдна да беларускіх уладаў.

“Мы таксама дасылаем вельмі ясны паралельны палітычны сігнал адносна таго, што вы павінны зрабіць. Вы павінныя вызваліць гэтых людзей з турмы, вы павінны дазволіць ім вярнуцца да сваіх сем’яў. І для нас вельмі важна дасылаць гэты пасыл, гаворачы, што калі вы выканаеце гэта, ёсць многа рэчаў, над якімі мы б маглі працаваць разам з вамі. І гэты пасыл мы таксама дасылаем як ад імя Еўрасаюза, так і ад асобных краінаў-членаў, якія маюць кантакты ў Беларусі. Мы дасылаем адныя і тыя ж сігналы. Мы робім гэта таму, што мы хочам, каб вы змяніліся, хочам, каб вы разабраліся з гэтымі пытаннямі. Але калі вы гэта зробіце, то мы – тут”, - запэўніла Кэтрын Эштан.

Як раней паведамляла Служба інфармацыі “ЕўраБеларусі”, чакаецца, што Еўрасаюз 23 сакавіка прыме рашэнне адносна пашырэння санкцыяў супраць беларускіх уладаў. Па непацверджанай інфармацыі, у чорны спіс патрапяць яшчэ 12 імёнаў і 29 арганізацыяў.

Віцэ-спікер Еўрапарламента Яцэк Пратасевіч не выключае, што супраць Беларусі могуць увесці таксама эканамічныя абмежаванні.