Андрэй Дынько папоўніў спіс невыязных з Беларусі

Личности

Шэф-рэдактара "Нашай Нівы" Андрэя Дынько раніцай 14 сакавіка не выпусцілі з Беларусі. Яго ссадзілі з цягніка "Мінск-Вільня". 

Прычыну абмежавання права на выезд памежнікі не ўдакладнілі, параіўшы звяртацца ў Аддзел міграцыі і грамадзянства МУС на месцы жыхарства. Такім чынам з’явілася новае пацверджанне наяўнасці спісу невыязных з Беларусі грамадскіх дзеячаў. Афіцыйна наяўнасць такога спісу не абвяшчалася.

Андрэй Дынько наступным чынам пракаментаваў забарону на выезд:

"Забарона на выезд - гэта высокая ацэнка працы газеты "Наша Ніва" і сайта NN.by, а таксама мяне як інтэлектуала. Што цікава, крыніцы ў высокіх структурах тлумачылі, што ў спіс увойдуць асобы, якія выказваліся за ўвядзенне санкцый супраць Беларусі. У сілу сваёй прафесіі і спецыялізацыі я на тэму санкцый ніколі не выказваўся. Таму мой выпадак - гэта доказ таго, што насамрэч гэта звычайны спіс заложнікаў. У асабістым сэнсе гэта, ясная рэч, зменіць мой лад жыцця. Раней я ўвесь час ездзіў па свеце з лекцыямі, дакладамі, выступамі. Зараз гэта будзе немагчыма. На гэтае лета мы з дзецьмі планавалі з’ездзіць на тыдзень у Кіеў да сяброў - таксама адпадае. Разумець, што ты ў закладніках, - своеасаблівае пачуццё. Але таксама ёсць разуменне, што ў беларускіх умовах гэта таксама вялікі гонар, - жартуе Андрэй Дынько. - Не кожны можа такім пахваліцца".