У Магілёве пад пагрозай страйкаў падымаюць заробкі

Кіраўніцтва Магілёўскага хлебзаводу № 4 вырашыла падвысіць заробкі сваім працаўнікам, паколькі спалохалася мажлівых пратэстаў.

Простыя рабочыя прадпрыемства атрымліваюць каля 1,1- 1,5 млн. рублёў ў месяц. Апрача таго, яны працуюць па 12 гадзінаў штодзённа, аднак зверхпраца ім не аплочваецца, паведамляе ПЦ “Вясна”.

Таму адна з брыгадаў хлебзавода распачала збор подпісаў за павышэнне заробкаў. Пасля гэтага супрацоўнікаў сабралі ў актавай зале і паведамілі ім, што з сакавіка тарыфная стаўка павышана на 10%, а далейшае павелічэнне заробкаў будзе адбывацца штомесяц.

Валянціна, якая прысутнічала на сходзе, адзначае, што ў актавай зале прысутнічала каля 30 рабочых.

“Прадстаўнікі адміністрацыі прадпрыемства паводзіліся сябе вельмі карэктна. Нікому не пагражалі расправай і звальненнем за збор подпісаў, які мы распачалі на хлебзаводзе, хаця раней з-за нашай ініцыятывы білі ў набат і не стрымлівалі пагрозы ў адрас ініцыятараў збору подпісаў. Сказалі, што павышаць заробак будуць рэгулярна. Чаго вартыя іх словы, мы паглядзім цягам бліжэйшых месяцаў”, - кажа жанчына.

“Пасля размовы з адміністрацыяй бунтарскі дух сціх, і рабочыя вырашылі ўзяць паўзу”, - кажа супрацоўніца заводу”, - дадала яна.

Як раней паведамляла Служба інфармацыі “ЕўраБеларусі”, 13 лютага працаўнікі Барысаўскага завода аўтатрактарнага электраабсталявання правялі страйк, паколькі атрымалі за папярэдні месяц па 1,3-1,5 млн. рублёў (158-183 долара). Пасля пратэстаў кіраўніцтва завода адразу ж паабяцала падвысіць заробкі на 20%.