Вялічка: Беларускі бок павінен першым зрабіць крок да нармалізацыі абсурднага канфлікта з ЕС

О нас в медиа

Беларуская Нацыянальная платформа Форуму грамадзянскай супольнасці Усходняга партнёрства прыняла адмысловую заяву з нагоды дыпламатычнага канфлікта паміж уладамі Беларусі і Еўрапейскім Саюзам. 

Узнікшая сітуацыя з’яўляецца толькі “верхавінай” канфлікту, падставы для якога былі створаны дзеяннямі беларускіх улад па разгону дэманстрацыі 19 снежня 2010 года і далейшымі рэпрэсіямі супраць беларускай палітычнай апазіцыі і грамадзянскай супольнасці, як адзначае адзін з падпісантаў заявы, сябра Нацыянальнай платформы Форуму грамадзянскай супольнасці Усходняга партнёрства Уладзіслаў Вялічка.

- Што тычыцца нармалізацыі стасункаў, то я думаю, што гэта пытанне доўгатэрміновае і павінна будавацца на ідэі двухбаковай "дарожнай карты" па паляпшэнні стасункаў, якія былі пагоршаны ў выніку рэакцыі на падзеі снежня 2010 года.

Беларуская Нацыянальная платформа Форуму грамадзянскай супольнасці Усходняга партнёрства разглядае рэакцыю беларускіх улад на рашэнне Савета Еўрасаюза пашырыць спіс беларускіх чыноўнікаў, у дачыненні да якіх дзейнічаюць візавыя абмежаванні, як незбалансаваныя і шкодныя для беларускіх нацыянальных інтарэсаў. На думку Уладзіслава Вялічкі, першы крок насустрач дыялогу павінна цяпер зрабіць Беларусь:

- Тут стаіць пытанне захавання твару, хто зробіць першы крок, каб гэтая сітуацыя пачала вяртацца да нармальнай. Я думаю, што гэта павінен быць беларускі бок. Калі сітуацыя наўмысная, то думаю, што тады мы не можам чакаць хуткага вырашэня сітуацыі. У той жа час мы павінны разумець, што Еўрапейскі Саюз чакае таксама пэўнай рэакцыі і сігналаў афіцыйнага Мінска наконт таго, ці збіраецца Мінск рабіць якія-небудзь крокі па нармалізацыі гэтага дастаткова абсурднага канфлікта.

Рэакцыя афіцыйнага Мінска, на думку падпісантаў заявы, умацоўвае атмасферу недаверу і варожасці паміж Беларуссю і Еўрапейскім Саюзам. А гэта ў сваю чаргу вядзе да далейшага абвастрэння супярэчнасцей замест прадуктыўнага дыялога і ўзаемнакарыснага супрацоўніцтва і добрасуседства.