У Мінску арыштавалі кіраўніка “Тэхнабанка”

Упраўленне Следчага камітэта па Мінску затрымала старшыню назіральнага савета ААТ “Тэхнабанк” Уладзіслава Кацарэнку.

Пра гэта паведамілі ў аддзеле інфармацыі і сувязі з грамадскасцю Следчага камітэта, піша Charter97.Org.

Банкіра падазраюць у здзяйсненні злачынства, прадугледжанага ч. 6 арт.16 (“Саўдзел у злачынстве”) і ч. 2 арт. 243 (“Ухіленне ад выплаты сум падаткаў, збораў”) Крымінальнага кодэкса РБ.

“У следства ёсць падставы меркаваць, што падазраваны аказваў дапамогу службовым асобам шэрагу суб'ектаў гаспадарання на тэрыторыі Рэспублікі Беларусь ва ўхіленні ад выплаты падаткаў”, - паінфармавалі ў камітэце.

Крымінальную справу ўжо распачалі супраць старшыні савета дырэктараў ЗАТ “Белзамежбуд”, кіраўніка назіральнага савета ЗАТ “Трастбанк” Віктара Шаўцова. Справу расследуе КДБ Беларусі.

Віктара Шаўцова падазраюць у асабліва буйным крадзяжы. Па інфармацыі charter97.org, яго затрымалі ў сярэдзіне восені. Па чутках, падставай для арышту маглі стаць праблемы кампаніі “Белзамежбуд”, якая займаецца будаўнічымі праектамі ў Венесуэле: нібыта венесуэльскія партнёры злавілі беларусаў пры спробе выкрасці дзве тоны арматуры. Інфармацыя пра гэта прагучала падчас чарговага візіту ў Венесуэлу памочніка прэзідэнта Беларусі Віктара Шэймана, а ў далейшым пра скандал далажылі Аляксандру Лукашэнку.