Асамблея НДА: Дзеянні беларускіх улад прывялі да каштоўнаснага ў сваёй аснове канфлікта з ЕС

Толькі вызваленне і поўная рэабілітацыя палітвязняў, а таксама спыненне ўсіх форм ціску на незалежную грамадзянскую супольнасць, паводле сябраў Рабочай групы Асамблеі няўрадавых дэмакратычных арганізацый, створаць магчымасць для пераадолення комплекснага крызыса, у якім знаходзіцца краіна, міжнароднай ізаляцыі і для ўхілення пагрозы незалежнасці Беларусі. Адмысловая заява з гэтай нагоды была прынята на чарговым паседжанні Рабочай групы ў Мінску.

Прадстаўнікі Асамблеі НДА абмеркавалі канфліктную сітуацыю паміж Мінскам і Еўрапейскім Саюзам пасля пашырэння санкцый у дачыненні да беларускіх чыноўнікаў і дыпламатычнага дэмарша з боку Беларусі, і канстатавалі, што менавіта антыдэмакратычная палітыка дзяржаўных улад прывяла да рэзкага абвастрэння палітычнага канфлікта афіцыйнага Мінска з Еўрапейскім Саюзам.

Асамблея НДА рашуча выказваецца супраць дзеянняў кіраўніцтва краіны, якія яшчэ больш аддялаюць Беларусь ад еўрапейскіх каштоўнасцей дэмакратыі і прывялі да каштоўнаснага ў сваёй аснове канфлікта.

“19 снежня 2010 года ўлады Беларусі пачалі чарговы, але беспрэцэдэнтны маштабамі наступ на асноватворныя правы і свабоды грамадзян. У краіне з’явіліся дзясяткі палітычных вязняў, у тым ліку кандыдаты ў прэзідэнты. Заклікі з боку грамадзянскай супольнасьці краіны да ўлады, гэтаксама як і захады Еўрапейскага Саюза распачаць дыялог, ігнараваліся рэжымам. Наадварот, улады і надалей дэманстратыўна парушалі правы чалавека, пра што яскрава сведчаць выпадкі з кінутымі за краты праваабаронцам Алесем Бяляцкім і актывістам Сяргеем Каваленкам”, - гаворыцца ў заяве.

Паводле прадстаўнікоў Асамблеі НДА, “цяперашнія паводзіны ўлад Беларусі, якія вынікаюць з іхнага імкнення любой цаной захаваць існуючы палітычны рэжым, адсоўваюць еўрапейскую перспектыву для краіны, знішчаюць міжнародную рэпутацыю ды эканамічную прывабнасць дзяржавы, робяць Беларусь безабароннай перад замахамі на яе эканамічную і палітычную незалежнасць”.

У заяве патрабуецца неадкладна вызваліць і юрыдычна рэабілітаваць усіх без выключэння палітычных вязняў, а таксама спыніць рэпрэсіі любога кшталту супраць незалежнай грамадзянскай супольнасці, палітычнай апазыцыі, незалежных мэдыяў.