У Галерэі "Ў" адбудзецца адкрытая дыскусія пра Універсітэт

6 сакавіка а 18.00 у Галерэі "Ў" (прасп. Незалежнасці, 37А) адбудзецца адкрытая дыскусія пра Універсітэт.

Падставай для абмеркавання і крытыкі стаў выхад у студзені 2012 года кнігі Уладзіміра Мацкевіча і Паўла Баркоўскага "Універсітэт: дыскусія пра падмуркі". Гэта першая кніга ў кніжнай серыі Лятучага універсітэта "Universitas Ludens".

Сабраныя пад адной вокладкай тэксты двух філосафаў прадстаўляюць два розныя погляды, якія задаюць рух да пошуку адказу на пытанне: "Якім быць сучаснаму Універсітэту ў Беларусі?". Аўтары дзеляцца не толькі сваімі разважаннямі пра ідэю Універсітэта, але і прапануюць хады і рашэнні па яго рэалізацыі ў Беларусі. Змест кнігі задае шэраг тэм і пытанняў, палемічных па сваёй сутнасці, якія патрабуюць крытыкі і абмеркавання з боку тых, хто зацікаўлены ў ажыццяўленні ідэі Універсітэта ў сучаснай Беларусі.

У рамках дыскусіі плануецца абмеркаваць:

• будучыню універсітэцкай адукацыі ў святле актуальных яго рэформ у Беларусі;

• неабходнасць стварэння адукацыйнага і навуковага цэнтра ў Беларусі як адказу на выклікі і праблемы сучаснага грамадства;

• жыццяздольнасць спалучэння класічных элементаў універсітэцкай мадэлі з інаватыўнымі, якія прэтэндуюць на рэалізацыю новага эканоміка-інфармацыйнага ўкладу;

• сумяшчальнасць элітарнага і эгалітарнага падыходаў у рамках Універсітэта.

Разам з аўтарамі кнігі пра падмуркі Універсітэта будуць дыскутаваць: Андрэй Лаўрухін (Дэпартамент філасофіі ЕГУ), Міхаіл Гусакоўскі (Цэнтр праблем развіцця адукацыі БДУ), Дзмітрый Карпіевіч (Асацыяцыя дадатковай адукацыі і асветы), Мікалай Сямёнаў (Інстытут тэалогіі БДУ). Вядучы - незалежны эксперт Уладзімір Дунаеў.

Анлайн-трансляцыя дыскусіі: http://distance.fly-uni.org/mod/page/view.php?id=430

Запрашаем  усіх зацікаўленых!