Кіраўніцтва “Экспабела” ўцякае ад сваіх арандатараў

Прадпрымальнікі мінскага рынка “Экспабел” не змаглі зарэгістраваць зварот аб незаконнасці дадатковага пагаднення арэнды, якое навязвае ім адміністрацыя тарговага цэнтра.

З сваім зваротам яны 28 лютага спрабавалі ўвайсці ў будынак, дзе знаходзіцца кіраўніцтва рынка, аднак туды прадпрымальнікаў не прапусціла ахова. На патрабаванне прадаставіць пісьмовую адмову ў рэгістрацыі звароту прадпрымальнікам параілі скарыстацца скрыняй для лістоў і прапаноў.

“У мяне ёсць указанне ўсіх туды не прапускаць. І па адным таксама. Калі вы жадаеце індывідуальна, ёсць усталяваны парадак, скрыня для лістоў. Усё будзе зарэгістравана", - цытуе ахоўніка БелаПАН.

Як раней паведамлялася, Грамадскае аб’яднанне “Перспектыва” звярнулася ў Камітэт дзяржкантролю з нагоды незаконнага павышэння кошту арэнды для прадпрымальнікаў у 3,36 раза ў гандлёвым цэнтры “Экспабел” (“Верхні пасаж”).

Пра тое, што адміністрацыя цэнтра вымушае прадпрымальнікаў падпісваць дадатковае пагадненне да дзейсных дамоваў арэнды, распавёў старшыня “Перспектывы” Анатоль Шумчанка. Прадпрымальнікаў у прымусовым парадку абавязваюць браць у арэнду адзін квадратны метр агульнай плошчы памяшкання - частку хола, якую мяркуецца выкарыстаць для ўсталявання манекенаў. Гэта будзе каштаваць арандатарам 261 еўра на месяц. У выпадку непадпісання дадатковага пагаднення арандатарам пагражаюць датэрміновым скасаваннем асноўнай дамовы арэнды.

Фота БелаПАН