Чыноўнікі не ідуць насустрач абаронцам парка 40-годдзя Кастрычніка

О нас в медиа

У Мінску прайшла сустрэча прадстаўнікоў Камітэта архітэктуры Мінгарвыканкама, адміністрацыі Ленінскага раёна і дэпутатаў райсавета з мясцовымі жыхарамі і грамадскасцю, якія выступаюць супраць знішчэння зялёных насаджэнняў у парку 40-годдзя Кастрычніка і будаўніцтва на вызваленай тэрыторыі гатэля "Пекін".

Паводле непасрэдных удзельнікаў, сустрэча не насіла характар абмеркавання і чыноўнікі альбо апраўдваліся, альбо намагаліся пераканаць сваіх апанентаў у неабходнасці будаўніцтва "стратэгічнага аб’екта", які не нясе для экалогіі горада і яго жыхароў ніякай шкоды.

Сябра аб’яднаньня "Зялёная сетка" Яраслаў Бекіш лічыць, што дзяржаўныя службоўцы найперш спрабавалі загладзіць "ляпы", дапушчаныя падчас высечкі парка пад будучае будаўніцтва. Між тым, на яго думку, разумна было б наладзіць падобнае абмеркаванне з зацікаўленымі бакамі яшчэ да таго, як прыступіць да фактычнага руйнавання паркавай зоны.

Прадстаўнікі грамадскасці, не пачуўшы рацыянальных прапаноў на вырашэнне канфліктнай сітуацыі, пацвердзілі, што вымушаныя дзейнічаць у адпаведнасці з выпрацаваным планам:

падрыхтоўка пазову супраць гарадскіх улад, якія сваімі захадамі аказваюць негатыўны ўплыў на навакольнае асяроддзе;

пашырэнне міжнароднага рэзананса дзеля стварэння прэцэдэнта ў адстойванні права на экалагічную бяспеку;

"атака" на дзяржаўныя ўстановы з патрабаваннем замарожвання работ і пачатку паўнавартаснага дыялёгу з мясцовымі жыхарамі і абаронцамі парка 40-годдзя Кастрычніка.

Нягледзячы на тое, што паразумення з прадстаўнікамі ўлады падчас сённяшняй сустрэчы знойдзена не было, чыноўнікам перададзеныя пісьмовыя прапановы ў справе магчымых шляхоў вырашэння сітуацыі, якую яшчэ ёсць магчымасць не даводзіць да тупіковай.