Міжнародны кансорцыюм “ЕўраБеларусь” віншуе сваіх калег з Асамблеі НДА з 15-годдзем!

22 лютага Асамблея няўрадавых дэмакратычных арганізацый Беларусі, найбуйнейшае згуртаванне айчынных грамадскіх аб’яднанняў, адзначыла сваё 15-годдзе. У лютым 1997 года на ўстаноўчым кангрэсе Асамблеі ўзялі ўдзел 250 арганізацый, якія былі яднаныя агульнымі каштоўнасцямі і бачаннем супольных інтарэсаў.

На сённяшні дзень сябрамі Асамблеі НДА з’яўляюцца больш за 300 аб’яднанняў - як зарэгістраваныя арганізацыі, так і незарэгістраваныя ініцыятывы. Намаганнямі Асамблеі быў праведзены шэраг гучных агульнацыянальных кампаній, сярод якіх можна адзначыць: “SOS! Трэці сектар”, “Зробім лепш”, “Выбірай”, “Стоп 193.1!” ды інш. Ад 2009 года Асамблея адзначае і ўзнагароджвае “Чэмпіёнаў грамадзянскай супольнасці”.

За час свайго існавання і дзейнасці Асамблея няўрадавых дэмакратычных арганізацый спрабавала тройчы атрымаць рэгістрацыю ў Беларусі, аднак, з розных прычын, Мінюст адмаўляў ёй у рэгістрацыі. У ліпені 2011 года Асамблея была зарэгістравана ў Літве.

“Супольнымі высілкамі мы працягваем агучваць і адстойваць інтарэсы ўсяго сектара перад дзяржавай, спрыяць развіццю і поспеху арганізацый-сябраў, прасоўваць каштоўнасці дэмакратыі і грамадзянскага ўдзелу ў грамадстве", - адзначыў Сяргей Мацкевіч, цяперашні старшыня Рабочай групы Асамблеі НДА. Ён таксама заклікаў усіх сябраў Асамблеі падтрымліваць лістамі вязня сумлення Алеся Бяляцкага, які ўзначальваў Рабочую групу Асамблеі ў перыяд 2000-04 гадоў.

Сёлета па планах кіраўніцтва Асамблеі мае адбыцца VII Кангрэс Асамблеі няўрадавых арганізацый, да ўдзелу ў якім арганізатары запрашаюць як яе сябраў, так і іншых прадстаўнікоў "трэцяга сектара" Беларусі.

Міжнародны кансорцыюм “ЕўраБеларусь” шчыра віншуе калег і партнёраў з Асамблеі НДА са святам і жадае далейшага плённага супрацоўніцтва дзеля ўмацавання ролі і месца арганізацый грамадзянскай супольнасці ў сучасным беларускім грамадстве!