Анлайн-апытанне "Беларускіх навін": 40% чытачоў за эканамічныя санкцыі з боку ЕС

Болей за 40% чытачоў інтэрнэт-выдання "Беларускія навіны" лічаць, што Еўрасаюз павінен ўвесці эканамічныя абмежаванні супраць афіцыйнага Мінска.

Такія дадазеныя атрыманыя ў выніку анлайн-апытвання “Ці падтрымліваеце вы ідэю скараціць спіс неўезных у ЕС беларускіх чыноўнікаў?”

З усіх 2,478 тыс. апытанных станоўча адказала на пытанне 141 асоба (5,7%). Яшчэ 232 згодныя да іх далучыцца, калі ўлады вызваляць палітвязняў (9,4%).

Адваротнага меркавання прытрымліваецца 601 удзельнік (24,3%) апытання: “Спіс няўезных трэба нават пашырыць”. А найбольш папулярным стаў адказ: “Да візавых санкцый трэба дадаць эканамічныя”: За яго аддалі галасы 998 чытачоў рэсурса (40,3%).

Разам з тым 251 чытачоў (10,1%) мяркуе, што Еўрасаюз павінен навогул скасаваць усе санкцыі. Амаль столькі ж - 255 чалавек (10,3%) - заявілі: “Мне ўсё адно”.

Пры гэтым лічба галасоў за ўвядзенне эканамічных санкцый імкліва расце.

Як раней паведамляла Служба інфармацыі “ЕўраБеларусі”, некалькі тыдняў таму кіраўніца брусельскага “Офіса за дэмакратычную Беларусь” Вольга Стужынская заявіла, што ўведзеныя Еўрасаюзам абмежаванні супраць беларускіх улад з’яўляюцца неэффектыўнымі, а некаторыя нават пагаршаюць становішча краіны. “Я выступаю за тое, каб гэтыя санкцыі перагледзець”, - паведаміла яна.

У сваю чаргу старшыня Міжнароднага кансорцыюма "ЕўраБеларусь" Улад Вялічка і кіраўнік Рады "ЕўраБеларусі" Уладзімір Мацкевіч, падзяляючы меркаванне аб нізкай эфектыўнасці санкцый ЕС, у той жа час заявілі, што для скарачэння чорных спісаў беларускіх чыноўнікаў на сёняшні момант няма ніякіх падстаў. Разам з тым кіраўніцтва кансорцыюма выступае супраць увядзення эканамічных абмежаванняў у дачыненні да афіцыйнага Мінска. Іншыя эксперты таксама прытрымліваюцца меркавання, што жорсткія санкцыі эфекту не дадуць, бо ад іх пацерпіць у першую чаргу насельніцтва краіны, а не ўлады.

Што тычыцца пазіцыі Еўрасаюза, Савета ЕС прыняла пастанову пашырыць мажлівасці ўжывання санкцый у дачыненні як да фізічных, так і юрыдычных асобаў, якія парушаюць асноўныя правы і свабоды ў Беларусі. Напрыклад, у спіс няўезных на тэрыторыю ЕС могуць дадаць яшчэ 135 чалавек. Пра жорсткія эканамічныя санкцыі мова не ідзе, аднак прэзідент Еўрапарламента заклікае ўлады Беларусі неадкладна вызваліць палітвяўняў.

Цікава, што беларускі ўрад просіць Еўразійскую эканамічную камісію паўплываць на сітуацыю і паспрыяць адмене санкцый, якія ўвялі супраць Беларусі ЕС и ЗША.