Вызначаны лаурэаты прэміі "Люблю Беларусь"

У сядзібе беларускага ПЭН-цэнтра ў Дзень святога Валянціна ўзнагародзілi пераможцаў прэміі "Люблю Беларусь" у васьмі намінацыях, піша “Салідарнасць”.

Узнагароду за "Беларусізацыю" журы аддала Ігару Случаку, які змагаецца за тое, каб беларуская мова часцей ўжывалася на афіцыйным узроўні.

У намінацыі для замежнікаў - "Pro-Belarus" - узнагародзілі былога амбасадара Украіны Рамана Бяссмертнага за паслядоўную пазіцыю ў адстойванні дэмакратыі ў Беларусі.

Лепшай журналісткай года прызнаная Марына Коктыш, якая трапна  задала пытанне Лукашэнку пра парушэнне грамадскіх правоў у Беларусі, а таксама не збаялася паправіць яго ў ягоным адказе.

Лепшым палітыкам году па версіі журы з’яўляецца ініцыятар акцый маўклівых пратэстаў і адзін з кіраўнікоў суполкі "Рэвалюцыя праз сацыяльную сетку" Вячаслаў Дзіянаў.

Таксама адзначылі дзейнасць арганізатара акцый супраць павышэння кошту на паліва "Стоп-бензін" Арцёма Шаркова. Ён стаў лаўрэатам прэміі за "Грамадcкую чыннасць".

Пераможцам у намінацыі "Спорт" пасмяротна (загінуў 10 кастрычніка) прызнаны былы старшыня Беларускай асацыяцыі амерыканскага футбола Ігар Жукоўскі, якому належала ініцыятыва назваць мінскі клуб "Ліцвінамі", а кубак - у імя Вітаўта Вялікага. Узнагароду перададуць сваякам Жукоўскага.

У намінацыі "Культура" журы не магло не адзначыць мульт "Будзьма беларусамі!", створаны ў межах аднайменнай кампаніі, а прыз быў аддадзены рэкламшчыцы Юліі Ляшкевіч за ўклад у стварэнне мультфільма.

Галасавання за права звацца "Змагаром года" не было, бо, на думку арганізатараў прэміі, кожны з намінантаў у гэтай катэгорыі - Андрэй Пачобут, Мікіта Ліхавід, Андрэй Бандарэнка, Зміцер Галко, усе 16 палітычных зняволеных, якія застаюцца за кратамі - прадэманстравалi неверагодную сілу духа і мужнасць. Таму адзначылі ўсіх адразу.

Штогадовую прэмію "Люблю Беларусь" заснаваў у 2010 годзе "Малады фронт", сёлета яна ўручалася трэці раз. У гэтым годзе моладзевая арганізацыя вызначала толькі намінантаў на прэмію, а лаўрэатаў абірала адмысловае журы, у склад якога ўвайшлі  пераможцы мінулых гадоў. На падставе іх выбару і былі вызначаны пераможцы прэміі.