Еўразійскі Саюз уратуе ад санкцый Еўрасаюза? (Відэа)

О нас в медиа

Кіраўнікі краінаў Адзінай эканамічнай прасторы не будуць наўпрост дапамагаць афіцыйнаму Мінску ў канфлікце з Еўрасаюзам, мяркуе філосаф Уладзімір Мацкевіч.

"Зварот Румаса гаворыць і пра тое, што гэты Саюз ствараецца як палітычны звяз і не выконвае сваіх функцыяў з пункту гледжання кіраўнікоў гэтых краін. Ён нібыта мае супрацьстаяць палітыцы Еўрасаюза ў рэгіёне, але ні сілы, ні разумення, як гэта рабіць, ні ў воднага кіраўніка Еўразійскага Саюзу няма", - дадаў ён.

Урад Беларусі звярнуўся да партнёраў па Адзінай эканамічнай прасторы (АЭП) з просьбаю выпрацаваць кансалідаваную пазіцыю ў пытанні санкцый супраць Беларусі з боку ЕС і ЗША. Агенцтва БелаПАН са спасылкаю на крыніцу ў Савеце міністраў паведамляе, што ліст з такою просьбаю віцэ-прэм’ер Сяргей Румас накіраваў старшыні Еўразійскай эканамічнай камісіі (ЕЭК) Віктару Хрысценку. Румас прапаноўвае разгледзець гэтае пытанне на чарговым пасяджэнні Савета ЕЭК.

"Ім прыйдзецца гэты выбар рабіць, і думаю, што ў гэтым выпадку выбар будзе не на карысць Беларусі. І з гэтай няёмкасці Назарбаеў і Пуцін будуць выходзіць проста замаруджваючы, адцягваючы рашэнне, не прымаючы яго. Таму плёну гэты зварот Румаса ніякага не дасць", - мяркуе Уладзімір Мацкевіч.

10 лютага Савет Еўрасаюза прыняў пастанову, якая пашырае магчымасці прымянення санкцый у дачыненні беларускіх фізічных і юрыдычных асоб, датычных да парушэнняў асноўных правоў і свабод.

"Нашыя ўлады з цяжкасцю разумеюць, наколькі канфрантацыя з Еўропай і ўсім светам кепска ўплывае на краіну, на ўсе працэсы і акалічнасці ў краіне, палітычныя, эканамічныя ды ўвогуле на жыццё людзей", - падкрэслівае Уладзімір Мацкевіч.

Дамову пра стварэнне Еўразійскай эканамічнай камісіі прэзідэнты Беларусі, Казахстана і Расіі падпісалі ў лістападзе 2011 года. Еўразійская эканамічная камісія - наднацыянальны орган, які кіруе інтэграцыйнымі працэсамі ў фарматах Мытнага саюза і АЭП. Узначальвае яе Віктар Хрысценка. Камісія складаецца з Савета і Калегіі. У склад Калегіі ўваходзяць тры прадстаўнікі ад кожнай дзяржавы, а ў склад Савета - віцэ-прэм’ер ад ураду кожнай краіны. Старшыня Савета ЕЭК - Сяргей Румас.

Крыніца