У Барысаве і Баранавічах страйкуюць рабочыя

Раніцай 13 лютага працаўнікі Барысаўскага завода аўтатрактарнага электраабсталявання правялі папераджальны страйк. Рабочыя баранавіцкага "Атланта" 14 лютага з той сама мэтай праводзяць сход.

У панядзелак на асноўнай пляцоўцы вытворчасці БАТЭ часова спынілі працу зборшчыкі электраабсталявання, пазней да акцыі пратэсту далучыліся работнікі 2-й вытворчай пляцоўкі. Падзеі пачаліся неўзабаве пасля таго, як людзі атрымалі разліковыя рахункі за папярэдні месяц, перадае Радыё Свабода са спачылкай на Міхаіла С.

Як распавёў мужчына, заробкі паводле вынікаў працы ў студзені складаюць 1,3-1,5 мільёна рублёў (158-183 долара).

У адміністрацыі прадпрыемства адмаўляюцца спраўдзіць факт часовага страйку, аднак не абвяргаюць, што намеснікі генэральнага дырэктара БАТЭ Аляксандар Марчанка і Андрэй Скрыпко сустракаліся з забастоўшчыкамі, запісвалі іхнія патрабаванні і паабяцалі паведаміць пра вынікі разгляду цягам тыдня.

Тым часам супрацоўнікі завода "Атлант" у Баранавічах збіраюццца выказаць свае прэтэнзіі адміністрацыі. Для гэтага яны плануюць правесці сход у аўторак пасля працоўнага дня, паведамляе Еўрарадыё.

Рабочыя хочуць спытацца ў адміністрацыі і прафкама, чаму заробкі цяпер не дацягваюць да двух мільёнаў, чаму адмянілі надбаўкі і не даплочваюць за тых, хто ідзе на лісток непрацаздольнасці.

Работнікі цэха зборкі рухавікоў пральных машын, дзе і пройдзе сход, скардзяцца таксама, што вымушаныя працаваць у шкодных умовах. У гэтым цэху стаіць печка, з дапамогай якой заліваюць ротары электрарухавікоў. Талоны на малако даюць толькі заліўшчыку, але на алергію пакутуюць многія работнікі.