Беларуская АЭС гарэла, не паспеўшы пабудавацца

Раніцай 12 лютага на будаўнічай пляцоўцы Астравецкай АЭС адбыўся пажар. З людзей ніхто не пацярпеў, матэрыяльная шкода перавышае тысячу долараў. 

Пра здарэнне стала вядома толькі днём пазней. Па словах будаўнікоў, загарэлася бытавое памяшканне на ахоўнай тэрыторыі будаўнічай пляцоўкі. Паводле спецыялістаў, папярэдняй прычынай загарання магла стаць няспраўнасць электрасетак абагрэву, перадае Радыё Свабода.

Ёсць звесткі, што ў агні згарэла маёмасць рабочых, якія карысталіся бытоўкамі. Папярэдне матэрыяльныя страты ад пажару ацэньваюцца прыблізна ў 10 мільёнаў рублёў (1,22 тыс. долараў). Дзеля высвятлення прычыны пажару створаная спецыяльная камісія.

У аддзяленні Міністэрства па надзвычайных сітуацыях па Астравецкім раёне паведамілі, што абышлося без чалавечых ахвяр. Аднак у стужцы навінаў на сайце МЧС інфармацыя пра здарэнне адсутнічае.

Разам з тым 13 лютага беларускі прэзідэнт Аляксандар Лукашэнка зноў заявіў, што будаўніцтва першай беларускай АЭС “ёсць скрайне важным праектам” і для Беларусі, і для Расіі, якая амаль што цалкам крэдытуе працы. "Зараз нам трэба хуткасна будаваць гэту станцыю", - прыводзіць словы кіраўніка дзяржавы БелТА.