Дыктатура абразілася на люстэрка

О нас в медиа

"НаеБАШ пра БАЖ" - менавіта так коратка і трапна ацаніў у сваім блогу нядзельны прапагандысцкі фільм Беларускага тэлебачання "БАШ на БАЖ" пра Беларускую асацыяцыю журналістаў знакаміты беларускі метадолаг Уладзімір Мацкевіч.

На канстатацыі трапнасці каментара паважанага эксперта развагі пра фільм, які не месціцца ані ў межах журналісцкай этыкі, ані журналісцкага (ды і нават прапагандысцкага) майстэрства, можна было б скончыць. Аднак з таннай падробкі БТ вынікае больш смутная выснова.

Нядзельны "наеБАШ пра БАЖ" у выкананні дзяржаўных прапагандыстаў - гэта папяраджальны стрэл у накірунку незалежнай беларускай журналісцкай супольнасці. Гэта сігнал таго, што над адной з найбольш уплывовых і патрэбных грамадскіх арганізацый навісла пагроза знішчэння. Логіка дыктатуры, якая пануе ў нашай краіне, не ўнікальная і не адрозніваецца ад логік іншых дыктатур. І ёй, як іншым, уласцівае пачуццё помслівасці, якое перарастае ў параною.

На Беларусі ўжо даўно знішчаныя дзеяздольныя структуры палітычнай апазіцыі. Пасля жорсткага прысуду кіраўніку Праваабарончага цэнтра "Вясна" Алесю Бяляцкаму ў значнай ступені знішчаны і праваабарончы рух. Пра ўсе гэтыя і іншыя непрывабныя бакі дыктатуры інфармуем мы - незалежныя журналісты. Мы, як люстэрка ў знакамітай казцы Пушкіна, калі ведаем, што ёсць нешта прыгажэйшае, чым дыктатура - кажам пра гэта, нягледзячы на помслівасць дыктатара. А ён, як казачная царыца, гатовы разбіць кожнае люстэрка, якое кажа яму праўду.

Крыніца