Мацкевіч: Пазіцыя ЕС наконт санкцый бліжэйшым часам не зменіцца (Відэа)

О нас в медиа

Эксперт упэўнены, што еўрапейскія палітычныя структуры не маюць падстаў для змянення жорсткай палітыкі ў адносінах да рэжыма Аляксандра Лукашэнкі. На скарачэнне "чорнага спісу" афіцыйны Мінск можа не спадзявацца.

З ініцыятывай перагляду спісу беларускіх чыноўнікаў, якім забаронены ўезд у Еўрасаюз, выступіў "Офіс за дэмакратычную Беларусь" (Брусель). Сярод асоб, якіх прапаноўваецца "рэабілітаваць", - рэктары беларускіх універсітэтаў, што спрычыніліся да выключэнняў студэнтаў паводле палітычных матываў, а таксама "гаманец Лукашэнкі" - бізнесовец Уладзімір Пефціеў.

Уладзімір Мацкевіч упэўнены, што гэта "лабістская акцыя", пры гэтым, на думку эксперта, эфектыўнасць гэтай акцыі - сумнеўная. "Давайце прызнаем фактам, што гэтая ініцыятыва зыходзіць з боку невялічкай колькасці людзей, неўплывовых, трэба сказаць. І казаць пра тое, што гэтая ініцыятыва паўплывае на пазіцыю Еўрасаюза, Еўракамісіі, Еўрапарламента, пакуль не магчыма", - падкрэсліў ён у інтэрв'ю Belsat.Eu.

Палітычнае рашэнне пра візавыя і эканамічныя санкцыі ў дачыненні Беларусі Савет Еўрасаюза прыняў 31 студзеня 2011 года ў Бруселі, калі міністры замежных спраў краін ЕС зацвердзілі спіс беларускіх чыноўнікаў, адказных за парушэнні правоў чалавека падчас прэзідэнцкай кампаніі. Гэтым асобам забаронена наведваць тэрыторыю Еўрасаюза, а іхныя рахункі і маёмасць у краінах ЕС павінны быць замарожаныя. Спачатку ў спісе было 158 імёнаў. Потым Савет ЕС неаднаразова пашыраў гэты пералік, і цяпер уезд у краіны Еўрасаюза забаронены больш як 200 беларускім чыноўнікам.