З “Граніта” звальняюць сваякоў пратэставаўшых супраць нізкіх заробкаў

Кіраўніцтва прадпрыемства па здабычы будаўнічага каменю “Граніт”, што ў Мікашэвічах (Лунінецкі раён Брэсцкай вобласці), пазбавіла працы машыністку і вартаўнічку. Мужы абедзьвух жанчын з’яўляюцца актывістамі Незалежнага прафсаюза.

Адна з іх, Людміла Літвінка, - жонка сакратара прафсаюза Анатоля Літвінкі. Па словах мужчыны, кіраўніцтва завода аказвае ціск не на саміх членаў прафсаюза, а на іхніх сваякоў.

“Пры гэтым шукаюць такія хады, каб нельга было зачапіцца юрыдычна. Мая жонка працавала на замяшчэнні дэкрэтнага адпачынку. Тая дзяўчына, якую яна падмяняла, яшчэ павінна была больш за два гады быць у дэкрэце. Аднак атрымалася так, што яна выйшла з дэкрэтнага адпачынку. І, як мы даведаліся, гэта яе проста папрасілі выйсці, каб звольніць маю жонку”, - прыводзіць словы Анатоля Літвінкі Радыё Свабода.

Дзеянні адміністрацыі прадпрыемства ён разглядае менавіта як ціск, паколькі спадарыне Людміле не прапанавалі іншую вакансію.

“У нас паводле практыкі было так на прадпрыемстве: калі ўжо чалавек працуе на замене дэкрэтнага адпачынку, для яго зараней ужо шукаюць іншую пасаду, але пакідаюць працаваць. Але з маёй жонкай вось так абыйшліся, бо яўна замова была. Так, фармальна атрымліваецца - ўсё правільна. Аднак нядаўна ў мяне адбылася размова з начальнікам структурнага падраздзялення, дзе мне зрабілі намёк наконт працы маёй жонкі”, - распавёў Анатоль Літвінка.

Звольненая жонка супрацоўніка “Граніта” Мікалая, які прасіў не паведамляць ягонае прозвішча, таксама падмяняла жанчыну, якая знаходзілася ў дэкрэтным адпачынку. І ёй таксама не прапанавалі іншай працы.

“Як сказаў начальнік драбільна-сартавальнага заводу Сяргей Міхайлаў, гэтыя актывісты Незалежнага прафсаюза дзесяцігодздзямі разам з сем’ямі не змогуць уладкавацца больш на „Граніт“. Маўляў, дзясятае пакаленне іх на завод не ўладкуецца. Гэта непасрэдна на планёрцы ім былі сказаныя такія словы ў прысутнасці многіх людзей”, - дадаў Мікалай.

Нагадаем, больш як месяц таму некалькі сотняў працаўнікоў “Граніта” выйшлі з афіцыйнага прафсаюза, паколькі былі незадаволеныя нізкімі заробкамі і некаторымі дзеяннямі кіраўніцтва завода. Пратэстоўцы правялі ўстаноўчы сход суполкі Незалежнага прафсаюза і зараз дабіваюцца яе рэгістрацыі.