Грамадскасць ратуе гiстарычны цэнтр Магiлёва

Праект прыбудовы да гандлёвага цэнтра "Магніт" з добраўпарадкаваннем прылягаючай тэрыторыі, што плануецца ў межах гістарычнага цэнтра Магілёва, стаў прадметам грамадскага абмеркавання.

Аб’ект размяшчаецца па вул. Першамайскай, побач з будынкам былога Пазямельна-сялянскага банку і будынкам былога дваранскага сходу (абодва - помнікі архітэктуры кан. XIX - пач. XX стст.).

Грамадскае абмеркаванне праводзіцца дзякуючы руплівай працы магілёўскай грамадскасці, у першую чаргу - гарадскога аддзялення Таварыства беларускай мовы на чале з Алегам Дзячковым пры падтрымцы Беларускага добраахвотнага таварыства аховы помнікаў гісторыі і культуры.

Важным мерапрыемствам стала пасяджэнне Архітэктурна-горадабудаўнічага савета пры Міністэрстве архітэктуры і будаўніцтва Рэспублікі Беларусь, на якім абмяркоўваўся вышэйназваны праект.

У пасяджэннi прынялi ўдзел заказчык аб’екта (кіраўнік ТС "МагнітСэрвісЦэнтр" Барыс Вакуленка), генпраектыроўшчык (архітэктар Міхаіл Вінаградаў), прадстаўнікі грамадскасці, у тым ліку Беларускага добраахвотнага таварыства аховы помнікаў гісторыі і культуры і Таварыства беларускай мовы.

Падчас абмеркавання былі агучаны шматлікія пункты гледжання з розных бакоў, якія супадалі ў адзіным - праект не адпавядае як крытэрыям заканадаўства аб ахове гісторыка-культурнай спадчыны, нарматыўных дакументаў у сферы горадабудаўніцтва, так і элементарным катэгорыям архітэктурнай эстэтыкі з улікам iснуючай горадабудаўнічай сітуацыі.

Па выніках абмеркавання праекта Архітэктурна-горадабудаўнічы савет вырашыў, што праект трэба прывесці ў адпаведнасць з дзеючымі нарматыўна-прававымі і тэхнічнымі дакументамі. У iншым выпадку, прапанаваны аб’ект трэба выносіць на іншую пляцоўку, за межы гістарычнага цэнтра Магілёва.

Такiм чынам, Архітэктурна-горадабудаўнічы савет пры Міністэрстве архітэктуры і будаўніцтва Беларусi можа стаць сапраўдным інстытутам кантролю з боку прафесіяналаў з далучэннем прадстаўнікоў грамадскаскіх аб’яднанняў над архітэктурнай і горадабудаўнічай дзейнасцю з мэтай недапушчэння памылковых рашэнняў.