"Украінскія ўлады бяруць прыклад з беларускіх"

Так пракамэнтаваў Службе iнфармацыi "ЕўраБеларусi" адмову ў регістрацыi жаночага руху FEMEN міністэрствам юстыцыі Украіны кіраўнік Навукова-даследчага цэнтра Мізэса Яраслаў Раманчук.

"Я лічу, што гэта абсурднае абвінавачванне арганізацыі, якая выбірае менавіта такія формы данясення сваіх мэсэджаў да людзей, да грамадзян, да Еўропы. Я нічога экстрэмісцкага ў дзейнасці гэтай арганізацыі не бачу, таму што яна не пагражае жыццю альбо маёмасці іншых людзей, не займаецца тэрарызмам. Так што ўкраінскія ўлады бяруць прыклад, безумоўна, не з тых краін, якія з’яўляюцца па-сапраўднаму дэмакратычнымі, якія шануюць права ўласнасці і грамадзянскай свабоды. Яны бяруць прыклад з беларускіх, расійскіх, паўднёва-карэйскіх, кубінскіх, савецкіх улад. Гэта савецкая спадчына, таму што павінен быць адзіны прынцып аднясення арганізацый да экстрымісцкіх. Калі ёсць пагроза жыццю і здароўю людзей, нейкія фізічныя дзеянні - тады гэта экстрымізм. А калі арганізацыя FEMEN асаблівым чынам сябе паводзіць - гэта, безумоўна, права кожнага чалавека на самавыражэнне", - дадаў Яраслаў Раманчук.

Як ужо паведамляла Служба iнфармацыi "ЕўраБеларусi", пра тое, што Дзяржаўная рэгістрацыйная служба Украіны адмовілася зарегістраваць украінскі жаночы рух FEMEN, 16 студзеня паведаміла кіраўніца арганізацыі Анна Гуцол. Адна з апошніх акцый руху была праведзеная ў Мінску - тры ягоныя ўдзельніцы ў знак пратэсту супраць беларускіх улад распрануліся каля будынка КДБ у цэнтры горада. Пазней дзяўчын затрымалі невядомыя, якія вывезьлі украінак у лес і моцна збілі. Ахвяры абвінавачваюць у выкраданні і здзеках супрацоўнікаў беларускіх спецслужб.