Валянцін Стэфановіч: Выдаваць французкую візу Куляшову - гэта недапушчальна

Францыя дапусціла сур'ёзную памылку, дазволіўшы ўехаць на тэрыторыю краіны міністру ўнутраных спраў Беларусі Анатолю Куляшову. Пра гэта ў інтэрўю Службе інфармацыі "ЕўраБеларусi" заявіў намеснік кіраўніка Праваабарончага цэнтра "Вясна" Валянцін Стэфановіч.

Анатоль Куляшоў, які з’яўляецца неўяздным у Еўрасаюз, з 17 па 20 студзеня знаходзіцца з візітам у Ліёне, дзе змешчаны Генеральны сакратарыят Інтэрпола. Супрацоўнікі французкай амбасады заявілі, што па просьбе Інтэрпола выдалі Куляшову "візу абмежаванага дзеяння", якая не з’яўляецца шэнгенскай, а дае права наведаць Францыю выключна ў часе афіцыйнай паездкі. Яны ўдакладнілі, што візіт беларускага міністра ў Францыю не разглядаецца як двухбаковы, паколькі не запланавана кантактаў кіраўніка МУС Беларусі з французкім бокам.

"Я лічу, што гэта недапушчальна, - заўважыў Валянцін Стэфановіч. - Такога кшталту дзеячы, якія заяўляюць, што ўласнаруч кіравалі разгонам "Плошчы", якія выклікаюць нараканні ў праваабаронцаў - у тым ліку ў сувязі з катаваннем у беларускіх вязніцах, не павінныя прымаць удзел у працы міжнародных канферэнцый".

Разам з тым намеснік кіраўніка "Вясны" патлумачыў, што французкія ўлады не парушылі ў дадзеным выпадку прынятых Еўрасаюзам санкцыяй супраць беларускіх службоўцаў.

"Абмежаванні на ўезд у краіны Еўрапейскага Саюза не распаўсюджваюцца адносна ўдзелу ў міжнародных канферэнцыях, канферэнцыях АБСЕ, Інтэрпола і некаторых іншых. Аднак я як праваабаронца ўважаю, што Анатоля Куляшова не павінныя былі запрашаць на падобныя мерапрыемствы", - дадаў Валянцін Стэфановіч.