Юбілей БНР: Які сігнал далі ўлады? (Відэа)

Імпрэза стала самаю маштабнаю дазволенай акцыяй пад бел-чырвона-белымі сцягамі за апошнія гады.

"Суткі, затрыманні, штрафы, яны не мяняюць нашую краіну да лепшага. Нашая задача пераканаць і паўплываць на працэсы, якія ідуць у краіне, каб гэтага станавілася менш. Гэта гучыць пафасна, атрымаецца ў нас ці не. Але мы спрабуем, мы маладыя, стараемся, бо мы ў гэта верым", — тлумачыць "Белсату" арганізатар свята Павел Белавус.

Праз дзень арганізатары падвялі экспрес-вынікі

"Тое што планавалі атрымалася і гэта вельмі крута. Мы глядзім водгукі людзей, 95%, тыя хто былі ўпершыню, яны ўсе станоўчыя", — дзеліцца блогер Эдуард Пальчыс.

Напярэдадні святочнага канцэрта ў сталіцы і рэгіёнах, паводле праваабаронцаў, былі затрыманыя каля 120 чалавек, у тым ліку журналісты "Белсата" і праваабаронцы цэнтра "Вясна". Большасць адпускалі праз некалькі гадзін без складання пратаколаў.

Паводле ацэнак палітычных назіральнікаў, свята атрымалася

Але адбылося не дзякуючы, а насуперак жаданням афіцыйнага Минска. Улады, несумненна, не зацікаўленыя ў пашырэнні палітычных свабод, але гатовыя дамаўляцца з прадстаўнікамі грамадзянскай супольнасці. Пагатоў і на афіцыйным узроўні пераасэнсоўваецца спадчына БНР.

"Улада дала вельмі зразумелы пасыл: вы можаце рабіць тое, там і толькі так, як мы гэта дазволім, і толькі ў дазволеным фармаце можаце нешта рабіць, але гэта цалкам кантраляваная сітуацыя", — упэўнены палітолаг Андрэй Ягораў.

Упершыню з Днём Волі беларусаў віншавалі на афіцыйным узроўні

Віншавальныя словы беларусам даслалі прэзідэнт Польшчы Анджэй Дуда ды амбасадар Вялікабрытаніі ў Беларусі Фіёна Гіб. Урачыстасці да стагоддзя БНР адбыліся таксама ў Сейме Літвы і мэрыі Кіева. Але галоўнае, што імпрэзу арганізавалі, зрабілі ды прафінансавалі самыя беларусы.