Куды сыходзяць чыноўнікі пасля адстаўкі? (Відэа)

Пра кар’еру беларускага функцыянера на прыкладзе сімвала беларускага аграпраму — былой намесніцы міністра Надзеі Каткавец.

На пачатку 1990-х Надзея была галоўнаю эканамісткаю саўгаса

Але не звычайнага саўгаса, а калгаса "Гарадзец", які ўзначальваў Аляксандр Лукашэнка. Пасля таго, як Лукашэнка ўзначаліў краіну, угару пайшла і кар’ера ягонай паплечніцы. З 2003-га да 2012-га яна была намесніцаю міністра сельскай гаспадаркі Беларусі.

Любоў журналістаў Надзея Каткавец заваявала непаўторнаю манераю сваіх выступаў.

"Думаю, што як бы нам у гэтай сувязі ў тлумачэнні гэтаму пытанню і можа быць нават не гэтаму пытанню, а як бы нашай пазіцыі, што ўсё-такі мы яшчэ далёка ў шмат якіх пазіцыях ад сусветных цэн і ад цэн, на прадукцыю якіх даходзіць да канчатковага пакупніка ў нашых краінах... краінах нашых суседзей", — заявіла Надзея.

Пасля таго, як Каткавец пакінула Міністэрства сельскай гаспадаркі, яна накіравалася ў Маскву, дзе ўзначальвала Дэпартамент аграпрамысловага комплексу Еўразійскай эканамічнай камісіі.

Аднак ужо праз год Надзея Каткавец вярнулася ў Мінск, каб зрабіцца намесніцаю кіраўніка справамі прэзідэнта.

Нядаўна ў кар’еры Надзеі Каткавец адбыўся новы паварот

Яна заняла пасаду намесніка генеральнага дырэктара Беларускай нацыянальнай біятэхналагічнай карпарацыі. Міжнародная кампанія будзе вырабляць амінакіслоты і камбікорм для жывёлагадоўлі.

"Яна будзе прадстаўніком уладаў, які будзе адказваць за развіццё кампаніі. Можа быць, яна не ўмее гаварыць, усім яна вядома выказваннямі пра "хаацічэскія цэны", але, я думаю, яна разбіраецца ў сельскай гаспадарцы", — мяркуе эканамічны аглядальнік Аляксандр Ярашэвіч.

Сувязь са збеглым дыктатарам Кыргызстана?

Цікава, што больш як палова акцый Беларускай нацыянальнай біятэхналагічнай карпарацыі — у руках людзей з атачэння зрынутага прэзідэнта Кыргызстана Курманбека Бакіева.

"Кіраўніком гэтай біятэхналагічнай карпарацыі, яе генеральным дырэктарам з’яўляецца Данііл Урыцкі, або Даніяр Усенаў — гэта былы прэм’ер-міністр Кыргызстана, які асуджаны ў сваёй краіне за саўдзел у забойстве людзей, а таксама за перавышэнне ўладных паўнамоцтваў і аб’яўлены ў міжнародны вышук", — тлумачыць спадар Ярашэвіч.

Кар’ера Каткавец даволі тыповая для экс-міністра

Іх звычайна ўладкоўваюць у міжнародныя структуры, або яны знаходзяць сабе працу ў банках і міжнародных кампаніях — найчасцей з расійскім капіталам.

Напрыклад, былы міністр унутраных спраў Анатоль Куляшоў, які разганяў Плошчу 2010 года, працуе ў выканкаме Садружнасці Незалежных Дзяржаваў. Ягоны папярэднік на міністэрскай пасадзе Уладзімір Навумаў, які разганяў намётавае мястэчка на Кастрычніцкай у 2006-м, пасля адстаўкі з’ехаў у Маскву і некаторы час працаваў у дзяржаўнай карпарацыі "Ростехнологии".

У Маскве доўгі час працаваў і былы беларускі прэм’ер Уладзімір Ярмошын, які цяпер ёсць дарадцам беларуска-расійскай будаўнічай фірмы "Знешэканомбуд".

"Гэта чысты разлік. Разлік за паслугі, якія гэтыя чыноўнікі аказвалі расійскаму ўраду альбо бізнес-структурам тут, у Беларусі", — упэўнены філосаф і метадолаг Уладзімір Мацкевіч.

Найчасцей экс-міністраў можна знайсці ў кіраўнічых органах банкаў

Напрыклад, у Назіральным савеце беларускага прадстаўніцтва расійскага "Альфа-Банка" засядае былы кіраўнік адміністрацыі прэзідэнта Урал Латыпаў. Былы шэф КДБ Сцяпан Сухарэнка працуе ў беларускім дзяржаўным "Банку развіцця".

"Чалавек з досведам віцэ-прэм’ера або міністра мае сувязі і мае досвед. Ён мае пэўны ўплыў нават на прыняцце дзяржаўных рашэнняў", — даводзіць палітычны аглядальнік Аляксандр Фядута.

У назіральных радах банкаў, якія належаць заходнім ды расійскім інвестарам, засядаюць і сімвалы беларускіх дэвальвацый — былыя старшыні Нацыянальнага банка Пётр Пракаповіч ды Надзея Ермакова. Былыя міністры робяцца паспяховымі лабістамі — ніхто з іх не застаецца пакрыўджаным.