Лукашэнка падкарэктаваў "дэкрэт аб дармаедах"

Гэты дакумент уносіць змены ў дэкрэт №3 ад 2 красавіка 2015 г ода "Аб папярэджанні сацыяльнага ўтрыманства". У народзе гэты дакумент больш вядомы як "дэкрэт аб дармаедах", паведамляе Еўрарадыё.

Змены датычаць пераліку тых, хто вызваляецца ад уплаты так званага "падатку на дармаедаў". Не павінны плаціць гэты збор грамадзяне, унесеныя ў спіскавы склад нацыянальнай або зборнай каманды Беларусі. Вызваляюцца ад аплаты тыя, хто праходзіць альтэрнатыўную службу, а таксама ты, да каго ўжываюцца прадугледжаныя законам меры бяспекі, якія не дазвалялі ім удзельнічаць у фінансаванні дзяржаўных выдаткаў.

Грамадзяне, якія стаяць на ўліку беспрацоўных альбо якія навучаюцца па накіраванні біржы працы, не павінны плаціць "падатак на дармаедаў" толькі ў тым выпадку, калі яны не парушаюць свае абавязкі ў галіне занятасці насельніцтва. Асобы, якiя выхоўваюць дзяцей ва ўзросце да 7 гадоў, вызваляюцца ад аплаты збору пры ўмове, што дзіця ва ўзросце ад 3 да 7 гадоў не ходзіць у садок.

Мясцовым саветам дэпутатаў (або па iх даручэнні мясцовым выканаўчым ці распарадчым органам) даецца права вызваляць грамадзян ад выплаты збору, калі тыя знаходзяцца ў цяжкой жыццёвай сітуацыі.

Канчатковы тэрмін перасылкі паведамленняў з падатковай інспекцыі перанесены з 1 лістапада 2016 года на 20 студзеня 2017 года. Тэрмін выплаты збору перанесены з 1 снежня 2016 года на 20 лютага 2017 года. Гэта тлумачыцца неабходнасцю дадаткова ўдакладняць пералік асобаў, якім належыць выплаціць збор за 2015 год.