Жыхарам Магілёва адмовілі ў правядзенні святкаванняў Дня Волі

Мясцовым актвістам не дазволена правесці 24 сакавіка ўрачыстасці на пляцоўцы перад кінатэатрам «Радзіма» у гадавіну абвяшчэньня незалежнасьці Беларускай Народнай Рэспублікі, піша Радыё Свабода.

З заяўкай да выканаўчай улады звярталіся трое жыхароў Магілёва: Зміцер Салаўёў, Юры Новікаў і Сяргей Фамін. Адмову аргумэнтавалі тым, што «вызначаная дата для правядзення мерапрыемства не дазваляе ўзгадніць яго правядзенне».

Як кажа старшыня абласной структуры партыі БНФ Зміцер Салаўёў, каб разабрацца з фармулёўкай адмовы, заяўнікі хадзілі ў аддзел ідэалагічнай працы.

«Як патлумачылі нам, што ёсць зацверджаны план мерапрыемстваў, які складаецца пры канцы году, і мы не паведамілі тады пра намеры правесці сваё мерапрыемства, таму не трапілі ў гэты план. Адказ хітраваты і цікавы тым, што нас не паслалі з нашым мерапрыемствам на вуліцу Чалюскінцаў, на стадыён, дзе гарвыканкам вызначыў месца для правядзення публічных мерапрыемстваў, як тое было раней. Такім чынам, нам нібыта і не забаранілі — маўляў, трэба было раней звяртацца. Такі адказ нам далі, каб пазбегнуць суду. Ня выключана, што туды мы будзем звяртацца. Чаму БРСМ можа праводзіць мерапрыемствы на плошчы Зорак, а мы — не?»

У адказе за подпісам намесніка старшыні гарвыканкаму Мікалая Міхалені пазначана яшчэ адна прычыны адмовы: заяўнікі не заключылі дамоў з міліцыяй, камунальнікамі і медыкамі. Апазіцыянеры збіраліся ладзіць 24 сакавіка на плошчы Зорак гістарычныя віктарыны і канцэрт бардаў, планаваліся таксама экскурсіі па месцах, звязаных у Магілёве з Днём Волі.

Не дазволілі ўлады і пікет да Дня Волі і ў Клімавічах. Яго збіраліся правесці трое жыхароў райцэнтру 23 сакавіка. І ў Магілёве, і ў Клімавічах фармат мерапрыемстваў пераглядаецца.