Вынікі канферэнцыі Нацыянальнага Форума грамадзянскай супольнасці

5-6 ліпеня адбылася Канферэнцыя Нацыянальнага Форума грамадзянскай супольнасці Беларусі. Нацыянальны Форум з'яўляецца важным элементам у агульным механізме ўдзелу грамадзянскай супольнасці ў ініцыятыве Усходняга партнёрства. Яго сэнс заключаецца ў кансалідацыі і ўзгадненні пазіцый ўнутры грамадзянскай супольнасці на нацыянальным узроўні, выпрацоўцы агульнай стратэгіі ўдзелу прадстаўнікоў беларускага грамадзянскага грамадства ў Форуме грамадзянскай супольнасці Усходняга партнёрства, вылучэнні змястоўных прапаноў па развіццю ініцыятывы. Акрамя гэтага, за Нацыянальным Форумам замацавана права рэкамендацыі арганізацый да ўдзелу ў агульным Форуме грамадзянскай супольнасці, які адбудзецца 18-19 лістапада 2010 года ў Берліне. Беларусь стала другой пасля Арменіі краінай Усходняга партнёрства, дзе была сфарміравана адпаведная нацыянальная платформа для грамадзянскай супольнасці.

«Мэтай бліжэйшага этапа развіцця ФГС з'яўляецца стварэнне механізмаў ўключэння грамадзянскай супольнасці ў вызначэнне “позвы дня” або “дарожнай карты” разгортвання ініцыятывы Усходняга партнёрства”, - адзначыў дырэктар Цэнтра еўрапейскай трансфармацыі Андрэй Ягораў. “Рамкамі для пабудовы такіх “дарожных карт” па тэматычных платформах можа стаць метад адкрытай каардынацыі, які паспяхова рэалізуецца ў ЕЗ. Гэты метад дазваляе вызначаць ступень прасоўвання кожнай з краін і ўсяго рэгіёну ў цэлым да агульнай прасторы ЕЗ, рэалізуючы стратэгію мяккага кіравання, заснаваную не на санкцыях, а на рэгулярнай ацэнцы і маніторынгу, апісанні лепшых практык і публічнага прадстаўлення вынікаў гэтай адзнакі”, - адзначыў эксперт.

Удзельнікі канферэнцыі здолелі прыйсці да ўзгодненага меркавання па пытаннях актуальных задач грамадзянскай супольнасці Беларусі, вызначыць асноўныя прыярытэты змястоўнай работы па кожнаму з тэматычных напрамкаў Усходняга партнёрства. Гэтыя прыярытэты будуць пакладзены ў аснову тых "дарожных карт”, праца над якімі будзе працягнута пасля канферэнцыі. У дыскусіях было адзначана, што беларуская грамадзянская супольнасць яшчэ толькі асвойвае неабходныя кампетэнцыі для ўключэння ў паўнапраўны дыялог на міжурадавым узроўні. Праца над “дарожнымі картамі” з'яўляецца не толькі неабходнай часткай падрыхтоўкі да Форума грамадзянскай супольнасці ў Берліне, але і стымулюе рост і развіццё самой грамадзянскай супольнасці.
Ацэньваючы дзеянні і крокі беларускай дзяржавы і ўрада ў рамках ініцыятывы УП як недастатковыя, прадстаўнікі грамадзянскай супольнасці выказалі намер прапанаваць Грамадска-кансультатыўнаму савету пры Адміністрацыі Прэзідэнта РБ ўключыць пытанне аб Усходнім партнёрстве і ўдзеле ў ім грамадзянскай супольнасці ў парадак дня аднаго з сваіх бліжэйшых пасяджэнняў.

Важным вынікам Канферэнцыі стала вызначэнне спісу арганізацый, рэкамендаваных да ўдзелу ў Форуме грамадзянскай супольнасці ў Берліне ў лістападзе 2010. 32-е арганізацыі грамадзянскай супольнасці з 88-мі, што заявіліся да ўдзелу, атрымалі рэкамендацыі, якія будуць улічаныя, нараўне з рэкамендацыямі Дэлегацыі Еўрапейскай Камісіі, у працэсе канчатковага адбору ўдзельнікаў будучага Форума.

Аргкамітэт канферэнцыі