Што трэба ведаць школьнікам Беларусі аб Еўразвязе?

Менавіта такую незвычайную назву меў круглы стол, арганізаваны 27 снежня 2007 года Грамадскім аб’яднаннем “Адукацыйны цэнтар “ПОСТ” у сценах і пры судзеянні Мінскага міжнароднага адукацыйнага цэнтра імя Йаханеса Раў. 

Гэтая снежаньская сустрэча стала заключным крокам цэлай праграмы “Еўразвяз і Беларусь: ад спазнання да разумення, ад разумення да супрацоўніцтва”, якая ажыццяўлялася Цэнтрам “ПОСТ” на працягу другой паловы бягучага года.

Па словах аднаго з кіраўнікоў арганізацыі і вядучага круглага стала Дзмітрыя Карпіевіча, галоўнай мэтай праграмы было знаёмства настаўнікаў школ Мінска і Мінскай вобласці з фенаменам Еўразвяза, яго гісторыяй і сучаснасцю, а таксама авалоданне ўдзельнікамі праграмы прынцыпамі, зместам і формамі міжкультурнай адукацыі.

- Якія канкрэтныя мерапрыемствы адбыліся непасрэдна ў межах праграмы?

- Пад час праграмы было праведзена некалькі трохдзённых семінараў для настаўнікаў,  школа-семінар “Еўразвяз: ад тэорыі да практыкі”, пасля якіх настаўнікі-энтузіясты ў сваіх школах арганізавалі на падставе атрыманага вопыта свае ўрокі і пазакласныя мерапрыемствы, прысвечаныя тэме беларуска-еўрапейскіх дачыненняў.

- Ці можна прывесці нейкія прыклады таго, што адбывалася ў беларускіх школах па гэтай тэме?

- З задавальненнем! На сёняшняй прэзентацыі ўжо былі прадстаўлены і нават прадэманстраваны найбольш паспяховыя ініцыятывы настаўнікаў. Напрыклад, гэта інфармацыйныя гадзіны “Журналісцкі дослед: Ці трэба Беларусі ўступаць у ЕЗ?” (Слуцк), “Да еўрапейскага адзінства” (Жодзіна), урок “Еўразвяз! Еўразвяз? Еўразвяз…” (Мінск), “Ласкава просім у Еўразвяз” (Вілейка). Усе ўдзельнікі круглага стала настолькі актыўна і неабыякава рэагавалі на прапанаваны досьвед калег, што ў нас як арганізатараў увогуле не было неабходнасці стымуляваць дыскусію, заяўленую ў праграме сустрэчы.

- А якія з пытанняў выклікалі найвялікшую цікавасць альбо былі падняты ў якасці праблемных падчас дыскусіі?

- З аднаго боку, пры абмеркаванні былі закрануты пытанні, звязаныя з “еўрапейскай перспектывай” Беларусі: Як будуць развівацца беларуска-еўрапейскія дачыненні? Ці прыйдзе час, калі пытанне аб уступленні ў ЕЗ стане актуальным для Беларусі? Як уплывае развіццё беларуска-еўрапейскага супрацоўніцтва на працэс фармавання сучаснай ўласна беларускай ідэнтычнасці і нацыянальных інтарэсаў. З другога – існуе шэраг дыдактычных альбо метадычных пытанняў кшталту: Пры якіх умовах навучанне гэтай тэме будзе эфектыўным? Як дасягнуць аб’ектыўнасці пры разглядзе фенамена Еўразвяза на ўроках у школе? Варта адзначыць, што большасць такіх пытанняў абмяркоўваліся вельмі эмацыйна і не мелі адназначных і простых адказаў. Менавіта неадназначнасць і актуальнасць гэтай тэмы для сёняшняй Беларусі стала штуршком для нас распачаць гэтую праграму.

- Якія планы і перспектывы мае Цэнтар “ПОСТ” у працы з тэмай беларуска-еўрапейскага супрацоўніцтва надалей?

- Заключным прадуктам праграмы гэтага года стане з’яўленне інфармацыйнага дыска “Адзінства ў разнастайнасці: гісторыя, каштоўнасці, механізмы, перспектывы развіцця Еўразвяза. Інфармацыйна-метадычныя матэрыялы для настаўнікаў“. Наступным годам мы плануем працягнуць “еўрапейскую тэму” працай з настаўнікамі, пачаць аналагічныя праграмы для моладзі і студэнцтва, а таксама прапанаваць шэраг інфармацыйных і метадычных матэрыялаў.

Падрыхтаваў Улад Вялічка
[email protected]