“CHOICE-Беларусь: Спадчына і сучаснасць”: завершаны першы этап адбору ўдзельнікаў праграмы

Каманда міжнароднай праграмы “CHOICE — Cultural Heritage: Opportunity for Improving Civic Engagement” падсумоўвае вынікі 1-га этапу конкурсу праектных прапаноў: з 60 заявак 15 запрошаны ў другі тур.

Праца па адборы стала няпростай, але выключна цікавай, за што найперш трэба падзякаваць самім заяўнікам, многія з якіх – моцныя дзеячы ў культуры краіны, якія ведаюць праблемы культуры з практыкі і здольныя прапанаваць цікавыя ідэі.

Па сваёй праблематыцы пададзеныя 60 праектаў пацвердзілі некалькі актуальных патрэб у сацыякультурным полі Беларусі:  павышэнне культуры памяці,  захаванне традыцыйных творчых практык;  сістэматызацыя і практычнае выкарыстанне як шырокіх, так і вузкіх гістарычна-культурных дадзеных;  забяспечанне онлайн-даступнасці ўжо назапашанай інфармацыі аб беларускай культурнай спадчыне; фармаванне стратэгій мясцовага развіцця на аснове моцнай культурнай ідэнтычнасці і павышэнне якасці жыцця сродкамі культуры.

Усе пададзеныя на конкурс творчыя канцэпцыі прайшлі падрабязны аналіз і былі разгледжаныя 5 экспертамі. Разгляд праектаў адбываўся паводле спецыяльна распрацаванай  сістэмы ацэнкі па наступных крытэрах: рэлевантнасць, прагназуемая эфектыўнасць адносна прыарытэтаў праграмы і рэалізуемасць праекта у абазначаных часовых і рэсурсных рамках.

У 2-гі тур адбору запрашаюцца 15 заяўленых крэатыўных канцэпцый

Геаграфія праектаў, што прайшлі прамежкавы адбор, –  ахоплівае ўсю нашу краіну: абласныя гарады, некаторыя рэгіянальныя цэнтры, а таксама асяродкі, створаныя сталічнымі супольнасцямі ў рэгіёнах. Спектр тэмаў падтрыманых крэатыўных канцэпцый вельмі шырокі: гэта як матэрыяльная, так і нематэрыяльная культурная спадчына, мастацтва (ад народнага да сучаснага), дызайн, тэатр і іншыя сцэнічныя практыкі, спадчына мастацкіх школ і этнічных супольнасцяў, праца з культурным ландшафтам і музейная педагогіка.

Кожная з падтрыманых канцэпцый адлюстроўвае не толькі культурную спадчыну Беларусі, але і сучасныя выклікі, якія стаяць перад усімі намі, яе нашчадкамі. Гэта выклікі інтэрпрэтацыі, пераасэнсавання і ўвядзення здабыткаў культуры ў сацыякультурны кантэкст, ва ўжытак грамадствам.

Конкурс быў надзвычай высокім. На жаль, шэраг цікавых і перспектыўных праектаў не змаглі пераадолець гэты бар’ер, але каардынацыйная каманда праграмы зацікаўлена ў развіцці стасункаў і захаванні сувязяў з нашымі заяўнікамі.  Арганізацыі, якія не прайшлі па конкурсе ў 2-гі тур, тым не менш, змогуць скарыстацца іншымі магчымасцямі праграмы: знайсці партнёраў ва Украіне, Арменіі, Малдове, атрымаць кансультацыі, прыняць удзел у канферэнцыі, адукацыйных і дыскусійных мерапрыемствах, якія будуць абвешчаныя пазней у праграме на 2016 год.

Заяўнікі праектных канцэпцый, якія прайшлі на 2 этап конкурсу “CHOICE-Беларусь: спадчына і сучаснасць”, пры дапамозе кансультантаў і трэнераў праграмы працягнуць далейшую інтэнсіўную працу над сваімі праектамі да 20-га студзеня 2016 г. Адбор на 2-ім туры будзе не менш сур’ёзны: толькі з  6-7 праектамі будзе працягнутая праца. Тым не менш, для ўсіх 15 пераможцаў  першага тура ёсць дзве дадатковыя магчымасці:

• атрымаць важны досвед арганізацыйнай ацэнкі і фармавання стратэгіі развіцця пад куратарствам кансультанта;
• прыняць удзел у прафесійных семінарах і міні-стажыроўках у профільных арганізацыях у Беларусі, Украіне, Малдове і Арменіі.

Плёну і творчасці,

Каманда “CHOICE-Беларусь: спадчына і сучаснасць”.

Даведка “ЕўраБеларусі”: Міжнародны праэкт "CHOICE — Cultural Heritage: Opportunity for Improving Civic Engagement" рэалізуецца Асацыяцыяй агенцтв мясцовай дэмакратыi ALDA (Францыя) сумесна з Міжнародным кансорцыумам "ЕўраБеларусь" (Лiтва).

Праект разгортваецца ў Беларусі, Украіне, Малдове і Арменіі ў межах праграмы ЕС "Усходняе партнёрства" пры iнфармацыйнай і кансультацыйнай падтрымцы арганiзацый-партнёраў:

• Цэнтра культурнага менеджменту (Львоў, Украіна);
• Нацыянальнага камітэта ICOM (Кішынёў, Малдова);
• Адукацыйна-даследчага фонда Millennium (Ерэван, Арменiя);
• Грамадскага аб’яднання "Цэнтр сацыяльных інавацый" (Мінск, Беларусь).

Беларуская частка праекта — "CHOICE-Беларусь: спадчына i сучаснасць" — грунтуецца на каштоўнасці культурнай спадчыны як рэсурсу для ўмацавання і развіцця сучаснай беларускай ідэнтычнасці і еўрапейскага цывілізацыйнага выбару Беларусі. Арганiзатары праекта маюць мэтай надаць імпульс пашырэнню разнастайнасці інавацыйных падыходаў і ініцыятыў па ўвядзенні культурнай спадчыны Беларусі ў сучаснае культурнае жыццё беларускага грамадства.