У Мінску ІП масава прыйшлі ў міністэрства па падатках і зборах

ІП планавалі правесці сёння акцыю — Марш прадпрымальнікаў, але не атрымалі дазволу, таму вырашылі такім чынам выказаць сваю пазіцыю.

Каля 200 чалавек прыйшлі да будынка міністэрства па падатках і зборах, паведамляе "Еўрарадыё". Сярод іх таксама Анатоль Шумчанка і Мікалай Статкевіч, якія звярнулі ўвагу, што гэта не мітынг і яны сабраліся толькі каб аднесці заяву.

Адзін чалавек спрабаваў разгарнуць бел-чырвона-белы сцяг, але да яго падышоў Шумчанка і папрасіў гэтага не рабіць.

Як піша "Наша Ніва", дэманстранты гукалі «Міністра! Міністра!», але Сяргей Налівайка да прысутных не выйшаў. Шумчанка заклікаў дачакацца, калі скончыцца абед.

Уладзімір Някляеў сказаў, што рэжым у Беларусі грэбуе правамі і ІП, і настаўнікаў, і іншых катэгорый насельніцтва. Патрабаванні павінны не толькі быць эканамічнымі, але і палітычнымі. «Галоўнае — вярнуць уладу народу», — заклікаў Някляеў. 

«Вы павінны не прасіць, а патрабаваць», — заўважыў палітык.
Ні міністр, ні яго намеснікі да прадпрымальнікаў так і не выйшлі. З'явіўся толькі прэс-сакратар, які сказаў, што на ўсе звароты, дзе ўказаныя прозвішчы будуць цягам 15 дзён дадзеныя адказы і хуценька сышоў, адмовіўшыся ад каментароў.
Дарэчы, не ўсе прадпрымальнікі з рэгіёнаў даехалі да сталіцы. Міліцыя сёння затрымала мікрааўтобус з прадпрымальнікамі са Слоніма.