У Польшчы з'явіцца 17 брыгад войск тэрытарыяльнай абароны

Новыя брыгады змогуць разам з сухапутнымі войскамі праводзіць ваенныя дзеянні, антытэрарыстычныя аперацыі, змагацца з наступствамі прыродных і тэхнагенных катастроф.

Таксама жаўнеры будуць весці інфармацыйную і асветніцкую дзейнасць.

«Гэта жаўнеры якія будуць абараняць нашы малыя бацькаўшчыны», – так пра новы відзе ўзброеных сілаў Польшчы заявіў «Радыё Рацыя» шэф Вайсковага ваяводскага штаба ў Беластоку палкоўнік Ян Гурняк.

— Абарона Айчыны ад мілітарных пагрозаў, а таксама дапамога органам адміністрацыі ў галіне немілітарных дзеянняў, напрыклад, навадненняў, пажараў, чагосьці, з чым дзяржава на лакальным роўні не зможа ўправіцца. Раз у месяц, цягам двух дзён, будуць праходзіць навучанні і практыкаванні, а ў час вакацыяў пройдуць дзесяцідзённыя вучэнні на палігоне для ўсяго батальёну.

Ахвотныя служыць у тэрытарыяльнай абароне могуць падаваць свае заяўкі ў Вайсковыя дапаўняльныя камендатуры. Жаўнеры могуць разлічваць на штомесячную плату ў памеры 500 злотых. Першыя прысягі новых жаўнераў тэрытарыяльнай абароны пройдуць 11 красавіка ў Беластоку. Пра свой удзел ва ўрачыстасці ўжо заявіў міністр нацыянальнай абароны Польшчы Антоні Мацерэвіч.