Віленскі суд уручыў Гарбачову позву па справе 1991 году

Позва ў суд была накіраваная звычайнай поштай на адрас Фонду М. Гарбачова. Суд атрымаў паведамленне аб ўручэнні позвы. У адрасаваным суду лісце ёсьць подпіс М. Гарбачова. Больш ніякіх дакументаў суд не атрымаў, у прыватнасці, не паведамляецца, ці сведка мае намер прыбыць на працэс у Літве, ці ён згодны даць паказанні з дапамогай відэаканферэнцыі.

Віленскі акруговы суд у кастрычніку летась пастанавіў апытаць Гарбачова ў якасці сведкі. Просьбу апытаць былога лідэра Савецкага Саюзу падалі сын загінулага падчас крывавых студзеньскіх падзеяў Апалінараса Павілайціса Робертас Павілайціс і ягоны адвакат. Сам Гарбачоў раней адмаўляў, што даваў загад страляць у Вільні.

У ноч на 13 студзеня 1991 году ў выніку дзеянняў савецкіх вайскоўцаў каля Дому друку, тэлевежы і будынку Літоўскага радыё і ТВ было забіта 14 грамадзянскіх асоб. Сотні людзей атрымалі раненні, паведамляе "Радыё Свабода".