Украіна спыняе рэтрансляцыю расійскага тэлеканалу "Дождь"

В Украине

Адпаведнае рашэнне, ухваленае сёння на пасяджэнні Нацрады, было абгрунтаванае тым, што ў эфіры дадзенага тэлеканалу адміністрацыйная мяжа паміж Херсонскай вобласцю і Крымам успрымалася як мяжа паміж Украінай ды Расіяй. Апроч таго, на працягу 2016 году Нацрада не раз фіксавала парушэнні расійскім тэлеканалам украінскага заканадаўства — у ягоным эфіры прысутнічала расійская рэкляма, а журналісты незаконна наведвалі анексаваны Крым з тэрыторыі Расіі.

У сваю чаргу, генеральны дырэктар тэлеканалу "Дождь" Наталля Сіндзеева, каментуючы рашэнне Ўкраіны, заявіла, што тэлеканал працуе ў адпаведнасці з расійскім заканадаўствам.

"Адпаведна артыкулу 65 Канстытуцыі Расійскай Федэрацыі Рэспубліка Крым ёсць суб’ектам Расійскай Федэрацыі, — сказала яна. - Мне вельмі шкада, што Нацрада Ўкраіны ўхваліла такое рашэнне".

Паводле яе слоў, згодна з умовамі дагавораў з усімі правайдэрамі ва Ўкраіне вяшчанне "Дождя" па ўсёй тэрыторыі краіны ажыцьцяўляецца праз IP-злучэнне без прамой камерцыйнай рэкламы, пра што 8 жніўня Нацрада па тэлебачанні і радыёвяшчанні Ўкраіны была праінфармаваная.

"Спадзяюся, што наш украінскі глядач знойдзе магчымасць глядзець "Дождь" праз наш сайт, нашы прыкладанні ў Smart TV і іншыя каналы дыстрыбуцыі", — дадала Наталля Сіндзеева.

Украінскія правайдэры рэтранслявалі тэлеканал "Дождь" ад снежня 2014 году, калі Нацрада па тэлебачанні і радыёвяшчанні Ўкраіны прызнала яго адпаведным патрабаванням Еўрапейскай канвенцыі аб транспамежным тэлебачанні і дзейнаму заканадаўству Ўкраіны.

На сёння ва Ўкраіне для рэтрансляцыі забаронена каля 35 расійскіх тэлеканалаў, паведамляе "Радыё Свабода".