17 траўня ў Мінску — міні-канферэнцыя "Культура як фактар развіцця"

Маніторынг накіраваны на адсочванне рэалізацыі Рэспублікай Беларусь Канвенцыі ЮНЕСКА аб ахове і падтрымцы разнастайнасці форм культурнага самавыражэння. Канвенцыя засяроджваецца на развіцці умоваў для культурнай разнастайнасці, узмацненні ўплыву сферы культуры на развіццё грамадства і асобнага чалавека, пашырэнне магчымасці самавыражэння культурных груп і асобных людзей.

Упершыню маніторынг праводзіўся ў 2015 годзе, калі былі распрацаваныя асноўныя тэхнікі вымярэння і зроблены першы замер стану сферы культуры Беларусі ў адпаведнасці мэтам і каштоўнасцям Канвенцыі ЮНЕСКА. У гэтым годзе адбыўся другі замер, і даследчыкі прадставяць параўнаўчыя вынікі і высновы.

• Ці становяцца ўмовы дзейнасці ў сферы культуры больш спрыяльнымі для культурнай разнастайнасці і самавыражэння?
• Наколькі адпавядае прыняты Кодэкс Рэспублікі Беларусь аб культуры актуальным патрэбам сферы?
• Якія праблемы і напружанні найбольш адчувальныя?
• У якіх сферах культура робіцца ўплывовым фактарам?
• Як змяняюцца міжкультурныя стасункі ў беларускім грамадстве?

Адказы на гэтыя і іншыя пытанні, зробленыя на падставе экспертных ацэнак і аб’ектыўных паказчыкаў, будуць прадстаўленыя і абмеркаваныя падчас міні-канферэнцыі.

Даследчая група: Таццяна Вадалажская, Андрэй Ягораў, Кацярына Раманчык, Таццяна Кедрык, Алена Жасткова, Вольга Лашкевіч, Аляксей Зянько, Кірыл Мальцаў, Надзея Новікава, Алена Зуйкова.

У праграме мерапрыемства:

• Прадстаўленне вынікаў маніторынгу даследчай групай, дыскусія;
• Праца групаў па абмеркаванні прапановаў і перспектыўных крокаў у развіцці сферы культуры.

Па выніках сустрэчы заўвагі, высновы і рэкамендацыі будуць дададзеныя ў канчатковую публічную справаздачу, а таксама аформленыя ў матэрыял для Міністэрства культуры Беларусі.

Да ўдзелу запрашаюцца прастаўнікі дзяржаўных і недзяржаўных арганізацый, ініцыятыўныя групы і спецыялісты ў сферы культуры, бізнесоўцы і эксперты.

Міні-канферэнцыя "Культура як фактар развіцця" адбудзецца 17 траўня, у пятніцу, у памяшканні Willing Hotel Minsk (Мінск, вул. Леніна, 50). Пачатак — у 16.00.

Колькасць месцаў абмежаваная. Для ўдзелу неабходная папярэдняя рэгістрацыя.

Заяўкі прымаюцца да 14 траўня 2019 года.

Тэкст справаздачы па выніках маніторынгу будзе загадзя дасланы зарэгістраваным удзельнікам.

Па дадатковых пытаннях звяртайцеся:

• па нумары тэлефона: (+375 29) 2796339;
• на электронную скрыню: [email protected].