15 лістапада ў Мінску — прэзентацыя новай кнігі гісторыка Алеся Смаленчука

Кніга выдадзена ў выдавецтве Змітра Коласа пры падтрымцы Польскага Інстытута ў Мінску.

Аповед пра жыццё і смерць Рамана Скірмунта запрашае даследчыка і чытача да размовы пра лёс Беларусі і Польшчы ў ХІХ–ХХ стагоддзях, пра ролю "польскага чынніка", а таксама суадносіны нацыянальнага і сацыяльнага ў айчыннай гісторыі, пра драму літоўскіх і беларускіх палякаў у эпоху этнакультурнага нацыяналізму, пра краёвую ідэю і краёўцаў як апошніх грамадзян Вялікага княства Літоўскага, іх пошукі новай Радзімы, а таксама пра гісторыю шляхты гістарычнай Літвы ў перыяд кардынальных сацыяльных пераўтварэнняў.

Адначасна гэты жыццяпіс уздымае праблему сутнасці беларускай ідэі і яе папулярнасці, зноўку ставіць пытанні пра адзінства беларускага руху і ролю г.зв. "чалавечага фактара" ў палітычным і культурным Адраджэнні ХХ стагоддзя, пра шансы адстаяць незалежнасць БНР у 1918 годзе і, тым самым, далучыцца да супольнасці еўрапейскіх дзяржаў як "вольная з вольнымі і роўная з роўнымі".

Аўтар манаграфіі — Аляксандр Смалянчук, вядомы даследчык нацыянальных працэсаў на землях гістарычнай Літвы, у тым ліку краёвай ідэі і яе адэптаў, а таксама адзін з заснавальнікаў анлайн-праекта "Беларускі архіў вуснай гісторыі". Даследаваннем асобы Рамана Скірмунта і ягонай палітычнай і гаспадарчай дзейнасці займаецца больш за 20 гадоў. Аўтар збіраў звесткі ў архівах Беларусі, Польшчы, Нямеччыны, Расеі, Украіны, Літвы і Латвіі. Апроч таго, аналізаваў тэксты ягоных кніг і шматлікіх публікацый у перыядычным друку Расеі, БНР і Польшчы 1900-1930-х гадоў.

Кніга напісаная ў жанры гістарычнай біяграфістыкі. Асаблівасцю з’яўляецца ўключэнне ў аналітычны тэкст фрагментаў гістарычных дакументаў, публіцыстыкі Рамана Скірмунта і ягоных прамоваў.

Прэзентацыя кнігі Алеся Смаленчука "Раман Скірмунт (1868-1939): жыццяпіс грамадзяніна Краю" пройдзе ў Мінску 15 лістапада ў гатэлі "Манастырскі" (вул. Кірыла і Мяфодзія, 6). Пачатак у 18.00. Уваход вольны!

Прэзентацыя адбудзецца з удзелам аўтара і беларускіх гісторыкаў. Правядзе сустрэчу — каардынатар Лятучага ўніверсітэта Таццяна Вадалажская.