16 кастрычніка ў Лятучым універсітэце — першае паседжанне ўніверсітэцкага семінара ў новым сезоне

Гэты сезон будзе прысвечаны рэфлексіі праграмы стварэння Універсітэта ў Беларусі і трансфармацыі стану Універсітэта у сучасным свеце.

Мы адзначаем змены месца і прызначэння Універсітэтата як сацыяльнага інстытута ў сітуацыі надыхода інавацыйнай эпохі. Мы адзначаем змены сітуацыі ў беларускай публічнай і інтэлектуальнай прасторы: з’яўленне новых фарматаў, гульцоў, тэмаў і накірункаў, змены агульнай атмасферы і тэмпа. Мы маем 7-гадовы досвед практыкі пабудовы новай мадэлі адукацыі і арганізацыі мыслення. Усё гэта — матэрыял для роздуму, рэфлексіі і пошуку адказаў на пытанні і выклікі апошняга дзесяцігоддзя да развіцця Універсітэта ў сучаснай Беларусі.

Праца семінара ў гэтым годзе пачнецца з серыі дакладаў Таццяны Вадалажскай па наступных тэмах:

• Універсітэт як сацыяльны інстытут: крытыка і пераасэнсаванне;
• Універсітэт і змены інавацыйнай эпохі: новая сітуацыя самавызначэння;
• Карціна свету і змест адукацыі: пошукі "новых універсітэтаў".

Далейшыя тэмы і выступы будуць фармавацца па заяўках удзельнікаў семінара.

Семінары будуць адбывацца раз на два тыдні па аўторках.

Першае паседжанне ўніверсітэцкага семінара адбудзецца 16 кастрычніка (аўторак) у Лятучым універсітэце. Пачатак у 18.30. Уваход вольны!

Універсітэцкі семінар — гэта галоўнае месца і сродак самаразвіцця Лятучага ўніверсітэта. Ён існуе з 2009 года, у ім нараджалася сама ідэя Лятучага. Мэты семінара — аналіз і рэфлексія нашага руху, абмеркаванне ідэй і прапановаў па развіцці, фармаванне супольнасці дзеля паўстання Універсітэта ў Беларусі.