20 снежня ў Мінску — кансультацыйная сустрэча па прававых аспектах фінансавання НКА

Сустрэчу арганізуюць і праводзяць Цэнтр прававой трансфармацыі (Lawtrend) і Асамблея няўрадавых дэмакратычных арганізацый у супрацы з Еўрапейскім цэнтрам некамерцыйнага права (ECNL).

Да ўдзелу запрашаюцца прадстаўнікі беларускіх некамерцыйных арганізацый ды ініцыятыў.

Падчас мерапрыемства будуць разгледжаны пытанні актуальнага прававога рэгулявання фінансавых паступленняў для розных форм некамерцыйных арганізацый, у тым ліку:

• віды фінансавых паступленняў паводле заканадаўства;
• прадпрымальніцкая дзейнасць НКА;
• афармленне ахвяраванняў ад грамадзян;
• бязвыплатная (спонсарская) дапамога ад беларускіх юрыдычных асоб;
• атрыманне замежнага фінансавання ў форме замежнай бязвыплатнай дапамогі і міжнароднай тэхнічнай дапамогі.

Асобная ўвага будзе нададзена магчымым зменам у парадак атрымання і выкарыстання замежнай бязвыплатнай дапамогі праз унясенне змен у Дэкрэт № 5 "Аб замежнай бязвыплатнай дапамозе", што абмяркоўваюцца цяпер у дэпартаменце па гуманітарнай дзейнасці.

Напрыканцы мерапрыемства ўдзельнікі будуць мець магчымасць індывідуальных кансультацый па канкрэтных пытаннях, звязаных з прававым забеспячэннем фінансавання арганізацый грамадзянскай супольнасці.

Удзельнікі кансультацыйнай сустрэчы атрымаюць друкаваныя раздаткавыя матэрыялы па тэме прававога рэгулявання фінансавання некамерцыйных арганізацый.

Арганізатары кансультацыйнай сустрэчы будуць радыя вітаць на мерапрыемстве не больш за аднаго прадстаўніка ад адной арганізацыі. У выпадку, калі колькасць заявак будзе большая за колькасць месц на мерапрыемстве, перавага будзе нададзена ўдзельнікам, заяўкі якіх дэманструюць найбольшую зацікаўленасць у тэме семінара. Арганізатары не прадугледжваюць кампенсацыю транспартных выдаткаў, звязаных з наведаваннем мерапрыемства.

Кансультацыйная сустрэча "Фінансаванне некамерцыйных арганізацый: прававыя аспекты" адбудзецца 20 снежня, у сераду, пачатак — у 11.00, працягласць — да шасці гадзін. Пра месца правядзення і падрабязную праграму працы будзе паведамлена ўдзельнікам сустрэчы дадаткова.

Каб падаць заяўку на ўдзел у кансультацыйнай сустрэчы, трэба запоўніць электронную анкету ўдзельніка.

Апошні тэрмін падачы заявак на ўдзел — 14 снежня 2017 года, 18.00. Пацверджанне ўдзелу будзе даслана ўдзельнікам мерапрыемства не пазней за 16 снежня 2017 года.