Праект "Цытуй сваё!" распачынае Год беларускага мыслення

Праект "Цытуй сваё!" быў распачаты ў канцы траўня 2015 года шэрагам інстытуцый грамадзянскай супольнасці ды адукацыйных устаноў: Міжнародны кансорцыум "ЕўраБеларусь", Лятучы ўніверсітэт, Беларускі саюз дызайнераў, Грамадская кампанія "Будзьма беларусамі!", Беларускі калегіум, "Мова Нанова".

Ён заклікаў беларусаў звярнуцца да найлепшага з беларускай думкі, згадаць перліны, на якія мы не звяртаем увагі, бо яны побач, свае.

Цягам двух месяцаў кожны дзень на сайце Budzma.by мы разам траплялі ў рэзананс беларускага мыслення, сустракаліся са слушнымі думкамі і прыгожымі вобразамі. Максім Багдановіч і Андрэй Волян, Валянцін Акудовіч і Леў Сапега, Вольга Гапеева і Васіль Быкаў — дзясяткі імён і дзясяткі думак, якія калісьці займалі розум і сэрца нашых продкаў і сёння выклікаюць захапленне ад дакладнасці, жаданне працягнуць развагу ці паспрачацца ў нас.

Абвяшчаючы пачатак праекта, арганізатары казалі: "Мы цытуем каго заўгодна, толькі не тых, хто нарадзіўся і жыў на нашай зямлі, дыхаў тым самым паветрам, быў часцінкай нашай гісторыі, а значыць, і нас саміх. Кожная трапна і ёміста выказаная думка — наш супольны нематэрыяльны скарб, цагліна ў тым, што мы сёння называем беларускай культурай, яшчэ не да канца ўсведамляючы яе архітэктуру і вонкавыя межы".

За два месяцы мы адкрылі толькі невялікую частку гэтага скарбу. Дзякуй усім, хто далучыўся да складання анталогіі айчыннай думкі! На адрас электроннай пошты праекта: [email protected] было даслана больш за 250 цытат. Сярод фан-клуба беларускага мыслення хацелася б асабліва аддзячыць і адзначыць некалькі чалавек, якія даслалі найбольш арыгінальныя і цікавыя падборкі цытат: Ірына Часнок, Антон Шустаў, Алесь Гізун, Наталля Свірыда, Яўгенія Чаплінская, Зміцер Бейнарт-Саладуха, Антон Васільеў. Дзякуй вам, сябры!

Энтузіязм фан-клуба і прыгажосць думак не дазваляе нам спыняцца! Таму праект "Цытуй сваё!" не заканчваецца, а толькі распачынае Год беларускага мыслення.

Што далей?

• Пашыраем кола фан-клуба беларускай думкі! Уступаем у суполку "Цытуй сваё!" у Фэйсбуку, запрашаем сяброў, працягваем дасылаць і абмяркоўваць улюбёныя цытаты беларускіх аўтараў там. (Паштовая скрыня: [email protected] таксама застаецца надзейным спосабам падзяліцца перлінамі беларускага мыслення з грамадскасцю);
• Сустракаемся ў жніўні, каб звярнуцца да выбітных беларускіх дзеячаў грамадства, навукі і культуры па іх асабістыя падборкі з беларускага мыслення;
• Такім чынам, мы разам працягваем збіраць трапныя, глыбокія, нечаканыя думкі, каб выдаць іх у выглядзе кнігі зручнага кішэннага фармату. Канцэпт-макет кнігі распрацоўваецца. Хочацца, каб у выніку атрымалася зручная ў карыстанні, прывабная на выгляд і дотык, вартасная па змесце рэч. Каб і самому хацелася мець, і падарыць было не сорамна!

Акрамя гэтага, цягам Года беларускага мыслення, які нестандартна пачаўся ў траўні, мы разам будзем паступова засвойваць беларускую інтэлектуальную спадчыну — у словах, вобразах і дзеяннях. Неўзабаве да асэнсавання далучацца мастакі і дызайнеры, якія ўвасобяць ідэі і персоны ў візуальныя вобразы.

Сачы за навінамі і новымі падзеямі праекта ў суполцы "Цытуй сваё!" у Фэйсбуку!

Чытай! Думай! Слухай думкі папярэднікаў!

Пагаджайся альбо спрачайся з імі!

Цытуй сваё!

У склад аргкамітэта праекта ўваходзяць:

• Міхал Анемпадыстаў, Беларускі саюз дызайнераў;
• Таццяна Вадалажская, Лятучы ўніверсітэт;
• Улад Вялічка, Міжнародны кансорцыум "ЕўраБеларусь";
• Максім Жбанкоў, Беларускі калегіум;
• Глеб Лабадзенка, "Мова Нанова";
• Лізавета Неўмяржыцкая, Грамадская культурніцкая кампанія "Будзьма беларусамі!".