Афіцыйны адказ ад імя Еўракамісіі на рэзалюцыі, прынятыя на красавіцкай Канферэнцыі Нацплатформы

Напрыканцы чэрвеня прыйшоў ліст на імя Улада Вялічка, старшыні міжнароднага кансорцыума “ЕЎРАБЕЛАРУСЬ”, су-старшыні Кіруючага камітэта Форума грамадзянскай супольнасці Усходняга партнёрства ад кіраўніка Еўрапейскай службы знешніх дзеянняў па Еўропе і Цэнтральнай Азіі Міраслава Лайчака.

Ён падзякаваў за тое, што беларуская Нацыянальная платформа падзялілася з імі рэзалюцыяй сваёй Канферэнцыі, якая прайшла 11-12 красавіка 2011 году ў Менску ў рамках Форума грамадзянскай супольнасці УП. Падзяка была выказаная ад імя Кэтрын Эштан, вярхоўнага прадстаўніка Еўразвязу па замежных справах і палітыцы бяспекі, і Штэфана Фюле, камісара па пытаннях пашырэння ЕЗ і Еўрапейскай палітыкі добрасуседства.

Міраслаў Лайчак запэўніў: яны падзяляюць думку беларускай Нацыянальнай платформы аб тым,  што грамадзянская супольнасць робіць істотны ўнёсак у будучыню Беларусі і, нягледзячы на цяжкія ўмовы функцыянавання беларускіх НДА, яны працягваюць адыгрываць найважнейшую ролю ў абароне і спрыянні рэформам і больш шырокім разуменні дэмакратычных працэсаў, працэсаў грамадскай узаемадапамогі.

Еўрапейская служба знешніх дзеянняў і Еўразвяз не прызнаюць выбары 2010 году ў Беларусі і рашуча выступаюць супраць рэпрэсіяў у дачыненні да грамадзянскай супольнасці і прадстаўнікоў апазіцыі, што адбыліся пасля іх. Як след, 188 беларускіх чыноўнікаў, якія мелі непасрэднае дачыненне да апісаных рэпрэсіяў, былі занесеныя ў спіс санкцыяў Еўразвязу, уключаючы прэзідэнта Аляксандра Лукашэнку і іншых чальцаў яго адміністрацыі. ЕЗ асуджае гвалт мірнага насельніцтва з боку ўладаў, заклікае да неадкладнага спынення пераследу грамадзянскай супольнасці і патрабуе неадкладнага і безумоўнага вызвалення ўсіх асобаў, затрыманых па палітычных матывах. Прынятыя санкцыі могуць быць перагледжаныя толькі пры ўмове, што ўлады распачнуць рэальныя і істотныя крокі на шляху да вызвалення і рэабілітацыі ўсіх палітзатрыманых, а таксама спынення рэпрэсіяў ў дачыненні да дэмакратычных сіл.

Прэзідэнт Лукашэнка праводзіць палітыку, роўна адваротную той, якая ад яго чакаецца як ад прэзідэнта. Па гэтай прычыне, запэўнівае Міраслаў Лайчак, Еўрапейская служба знешніх дзеянняў і Еўракамісія будуць працягваць працу з дзяржавамі-чальцамі ЕЗ па пытаннях аб пашырэнні мераў у дачыненні да ўрада Беларусі.

У той жа час, Еўразвяз імкнецца пазбегнуць ізаляцыі беларускага насельніцтва. Еўрапейская служба знешніх дзеянняў і Еўракамісія яшчэ раз пацвярждаюць іх цвёрдую прыхільнасць да падтрымкі беларускай грамадзянскай супольнасці ў гэты нялёгкі перыяд. Пачынаючы з 19 снежня 2010 году, яны інтэнсіўна працуюць у напрамку ўзмацнення падтрымкі народа Беларусі.

Так, дапамога Савета міністраў Паўночных краінаў (Nordic Council of Ministers) заключаецца ў выдачы фінансавай дапамогі як асобным ахвярам рэпрэсіяў, так і арганізацыям грамадзянскай супольнасці. У цяперашні час распрацоўваюцца сярэднетэрміновыя праекты на 2011-2013 гады па падтрымцы беларускіх няўрадавых арганізацыяў, студэнтаў і незалежных СМІ. Ужо былі запушчаныя заклікі да ўдзелу ў дзвюх праграмах: праграме Еўрапейскага інструмента садзейнічання дэмакратыі і правам чалавека і праграме Недзяржаўных суб’ектаў. У верасні 2011 года будзе запушчаная спецыяльная стыпендыяльная праграма для беларускіх студэнтаў.

Што датычыцца намеру Еўразвязу ўмацоўваць кантакты паміж людзьмі, ён працуе па пытаннях спрашчэння візавага рэжыму і рэадмісіі для атрымання магчымасці працаваць з беларускай грамадскасцю ў цэлым. Нядаўна Еўрапейская камісія прапанавала Беларусі пачаць перамовы па гэтым пытанні. Засталося даведацца, ці захоча Беларусь супрацоўнічаць па гэтым пытанні.

Еўразвяз таксама будзе працягваць працаваць у бок найлепшага выкарыстання ініцыятывы Усходняга партнёрства і аспекту яго шматбаковага супрацоўніцтва. У прыватнасці, Форума грамадзянскай супольнасці Усходняга партнёрства, які, у якасці рэгіянальнага форума, прадстаўляе ўнікальны шанец для таго, каб меркаванне грамадзянскай супольнасці было пачутае на міжурадавым узроўні і дазволіла ўмацаваць кантакты грамадзянскай супольнасці з уладамі краінаў-партнёраў, асабліва ў такія цяжкія часы, якія зараз у Беларусі.

Акрамя таго, Міраслаў Лайчак звярнуў увагу на прыняты Еўракамісіяй і высокім прадстаўніком Еўразвязу "Новы адказ на змяненне Палітыкі добрасуседства" ад 24 траўня 2011 году,  які ставіць галоўнай мэтай Еўрапейскай палітыкі добрасуседства партнёрства з грамадзянскай супольнасцю. З мэтай умацавання патэнцыялу арганізацыяў грамадзянскай супольнасці, Еўразвяз намерваецца стварыць Інструмент грамадзянскай супольнасці ў рамках Інструмента Еўрапейскай палітыкі добрасуседства і партнёрства. Гэты інструмент значна пасадзейнічае намаганням, накіраваным на падтрымку грамадзянскай супольнасці.

Поспех у намаганнях Еўразвязу ў значнай ступені будзе залежыць ад узроўню каардынацыі паміж беларускімі інвестарамі. У той жа час, ЕЗ працягвае працаваць у рамках прыярытэтаў палітыкі і фінансавання, а таксама працягваць задзейнічаць прадстаўнікоў беларускай грамадзянскай супольнасці, як рэгулярна адбаваецца ў Брусэлі.

У заключэнне сп.Лайчак падкрэсліў, што ЕЗ поўны рашучасці падтрымліваць каштоўны ўнёсак грамадзянскай супольнасці ў развіццё краінаў Усходняга партнёрства (у тым ліку, безумоўна,  Беларусі), гэтаксама як прызнаваць дэмакратыю, вяршэнства закона і правы чалавека ў краінах Усходняга партнёрства як найважнейшыя каштоўнасці.  

 

Запампаваць тэкст ліста