Павал Латушка будзе займацца іміджам Беларусі за мяжой

У наступным годзе Дні культуры Беларусі пройдуць у Кітаі, Славэніі й Вугоршчыне, у Расеі будзе аб’яўлены Год культуры Беларусі, а ў краінах-суседках – Польшчы, Летуве, Украіне, Латвіі – адбудзецца цэлы шэраг культурніцкіх акцый.

Міністар культуры Беларусі Павал Латушка лічыць, што неабходна пашыраць супрацоўніцтва ў галіне культуры з Польшчаю як краінаю, зь якой аб’ядноўвае багатая сумесная гісторыка-культурная спадчына.

Міністэрства культуры накіравала запрашэньне міністру культуры Польшчы наведаць Беларусь зь візытам. Плянуецца сумесна ажыцьцявіць інаўгурацыю Году Шапэна ў Беларусі, што мае быць абвешчана ў якасьці сусьветнай акцыі.

Павал Латушка: З Рэспублікай Польшча мы зацікаўленыя ў актыўнай працы міжурадавай камісіі па ахове гісторыка-культурнай спадчыны. Дарэчы, апошняе пасяджэньне гэтай камісіі адбылося ў чэрвені ў Горадні на ўзроўні намесьнікаў міністраў культуры. Мы зацікаўленыя супрацоўнічаць у рэканструкцыі й рэстаўрацыі помнікаў, музэефікацыі аб’ектаў сумеснай гісторыка-культурнай спадчыны. Мы зацікаўленыя ва ўсталяваньні прамога супрацоўніцтва Нацыянальных музэяў і бібліятэк Беларусі й Польшчы, сумесным удзеле ў фэстывалях тэатраў, тэатраў народнага мастацтва й фальклёру. Будзем працаваць над унясеньнем Аўгустоўскага каналу ў Сьпіс сусьветнай культурнай спадчыны ЮНЭСКА.

Таксама міністар спадзяецца завяршыць культурніцкую акцыю, якую распачаў яшчэ ў статусе пасла Беларусі ў Польшчы.

Павал Латушка: Спадзяемся, што польскі бок рэалізуе той праект, аб якім мне даводзілася дамаўляцца як паслу Беларусі ў Польшчы, і перадасьць беларускаму боку копію партрэтаў зь нясьвіскай калекцыі Радзівілаў, якія ў 1950-м годзе былі перададзеныя Польскай Народнай Рэспубліцы па рашэньню ўраду БССР.

Шчыльная супраца мае быць і зь летувіскім бокам. Напрыклад, адзін зь летувіскіх тэатраў будзе ўдзельнічаць у міжнародным тэатральным фэсьце “Панарама”, які 7 кастрычніка адчыніцца ў Менску, абмяркоўваецца варыянт прэзэнтацыі культур Беларусі й Летувы ў штаб-кватэры Эўразьвязу ў Брусэлі. Шэраг праектаў у сфэры культуры будзе рэалізаваны ў межах праграмы “Ўсходняе партнэрства”. У іх ліку – праца беларуска-летувіскай экспэртнай групы па культурнай спадчыне й стварэньне сумеснага беларуска-летувіскага мастацкага фільму, прысьвечанага 600-годзьдзю Грунвальдзкай бітвы.

Ужо ў гэтым месяцы пройдзе сумесная калегія Міністэрстваў культуры, спорту й турызму па пытаньні разьвіцьця айчыннага турызму. На ёй у шэрагу іншых будуць разгледжаныя беларуска-летувіскі праект “Замкі ВКЛ” і нацыянальны “Залатое кальцо Беларусі”.

Спасылка