Прызначаная дата правядзення Беларускага Еўрапейскага Форуму

Да пачатку лістапада ў Беларусі мусяць прайсці рэгіянальныя сходы, на якіх будуць вылучаныя дэлегаты на Беларускі еўрапейскі форум. Цяпер пададзена 86 заявак на правядзенне сходаў па ўсёй краіне. Першыя рэгіянальныя сходы ўжо адбыліся ў Смалявічах і Клецку. Ад гэтых рэгіёнаў дэлегамі былі абраныя сем чалавек.

Аргкамітэт Беларускага еўрапейскага форуму зацвердзіў квоту прадстаўнічасці дэлегатаў, ўзор сімволікі і дакументаў Форуму. Цягам бліжэйшага тыдня распачне працу сайт форума – на ім можна будзе не толькі знайсці інфармацыю пра само мерапрыемства, але і зарэгістраваць сябе як удзельніка рэгіянальнага сходу па вылучэнні дэлегатаў. Арганізатары разлічваюць, што агулам ў Форуме возьмуць удзел каля тысячы чалавек.

Бліжэйшым часам на Беларускі еўрапейскі форум таксама будуць запрошаныя замежныя госці: дэпутаты Еўрапейскага парламенту, прадстаўнікі іншых структураў Еўразвязу і дыпламатычнага корпусу краінаў ЕЗ і краінаў-удзельніц Усходняга Партнёрства, палітыкі, прадстаўляючыя нацыянальныя парламенты. Нагадаем, што адно з першых запрашэнняў было перададзенае Старшыні Еўрапейскага парламенту Ежы Бузэку непасрэдна ад лідэра Руху “За Свабоду” Аляксандра Мілінкевіча.

Беларускі Еўрапейскі Форум – гэта ўнікальная інфарамацыйна-дыскусійная пляцоўка па пытаннях супрацоўніцтва Беларусі і Еўрапейскага Звязу. Гэта дыялог, удзел у якім можа ўзяць любы грамадзянін Беларусі: падзяліцца сваім бачаннем і даведацца пра меркаванне вядомых асобаў Беларусі і Еўропы.

Крызісныя з’явы ў дзяржаўнай сацыяльна-эканамічнай мадэлі, нестабільнасць стасункаў з Расіяй падштурхнулі ўлады да супрацоўніцтва з Еўрапейскім Звязам. Сёння мы бліжэй чым калі да змены геапалітычнага выбару Беларусі. Але толькі пры актыўным удзеле кожнага грамадзяніна Беларусі, падтрымцы з боку грамадзянскай супольнасці, пры палітычным плюралізме намаганні Еўрапейскага Звязу па вяртанні Беларусі ў еўрапейскую сям’ю дадуць плён.

Мэта Беларускага Еўрапейскага Форуму – падтрымаць паварот Беларусі ў бок Еўрапейскага Звязу, зрабіць незваротнымі працэсы еўрапеізацыі Беларусі, мабілізаваць прыхільнікаў і аб’яднаць патэнцыял беларускіх праеўрапейскіх сілаў.

Спасылка