Эўрапейскі суд абвінаваціў Польшчу ў абмежаваньні свабоды слова

У 1998 годзе ў часопісе, які выдаецца ў мястэчку Калбуды ля Гданьску, быў надрукаваны артыкул, аўтар якога крытыкаваў былога войта гміны ў негаспадарлівасьці. Справа адбылася напярэдадні выбараў у мясцовае самакіраваньне, у якіх прымаў удзел згаданы войт. Журналіста абвінавацілі ў абразе палітыка і ў стварэньні дрэннай рэпутацыі. Суд прысудзіў Яцаку Длугалэнцкаму штраф і пакрыцьцё коштаў судовага працэсу. Прысуд пацьвердзілі й іншыя судовыя інстанцыі Гданьску. 

З рашэньнем польскіх судзьдзяў не пагадзіўся Эўрапейскі суд па правох чалавека. У Страсбурзе прыйшлі да высновы, што артыкул пра негаспадарлівасьць войта быў напісаны ўзважліва. На думку эўрапейскіх судзьдзяў, артыкул Длугалэнцкага быў элемэнтам публічнай дыскусіі. “Спагнаньне польскага суду прымусіла журналіста выкарыстоўваць аўтацэнзуру”, – гаворыцца ў рашэньні Эўрапейскага суду па правох чалавека.

Cпасылка